WAQT NEWS

کراچی اسٹاک مارکیٹ میں آج زبردست اتارچڑھاؤرہا، کے ایس ای ہنڈریڈ انڈیکس چودہ ہزارپوائنٹس کی سطح برقرار رکھنے میں کامیاب رہا۔

TestUser — Thu, 17 May 2012 18:02:32 +0000

کراچی اسٹاک مارکیٹ میں کاروبارکا آغاز مثبت ہوا لیکن شئیرزکی فروخت ہنڈریڈ انڈیکس کو ٹریڈنگ کے دوران چودہ ہزار پوائنٹس کی سطح سے بھی نیچے لے گئی تاہم کاروبار کے اختتام پر بینکس اور سیمنٹ اسٹاک میں نمایاں تیزی نے مارکیٹ کو چودہ ہزار پوائنٹس کی سطح برقرار رکھنے میں مدد دی۔ کاروبار کے اختتام پر کے ایس ای ہنڈریڈ انڈیکس اٹھارہ پوائنٹس کمی کے بعد چودہ ہزار تریسٹھ پوائنٹس پربند ہوا۔ مجموعی کاروباری حجم چودہ کروڑتیس لاکھ شئیرز تک محدود رہا حجم کے اعتبارسے پی ٹی سی ایل کے شئیرز میں سب سے زیادہ سودے ہوئے۔ کاروبار کے اختتام تک ایک سو ستر کمپنیوں کے حصص کی قیمت میں اضافہ اور ایک سو چالیس کمپنیوں کے حصص کی قیمت میں کمی ہوئی۔ بروکرز کا کہنا ہے کہ نیٹو سپلائی کی بحالی کے بعد امریکہ سے ملنے والی امداد مارکیٹ کی پرفارمنس پربہتراثرڈال سکتی ہے۔ دوسری جانب لاہورسٹاک مارکیٹ میں آج تیزی رہی۔ ایل ایس پچیس انڈیکس پندرہ پوائنٹ کے اضافے کے ساتھ تین ہزار چھ سو اکتالیس پر بند ہوا۔ مارکیٹ میں پچانوے کمپنیوں کے بیس لاکھ چوراسی ہزار چھ سو نوے حصص کا کاروبار ہوا۔ ستائیس کمپنیوں کے حصص میں اضافہ، پندرہ کمپنیوں کے حصص میں کمی جبکہ تریپن کمپنیوں کے حصص میں استحکام رہا۔

آرمی چیف جنرل اشفاق پرویزکیانی سے چیئرمین نیب فیصح بخاری نے ملاقات کی،این ایل سی سکینڈل میں مشترکہ تحقیقات کرنے پر اتفاق کیا گیا ہے

TestUser — Thu, 17 May 2012 17:30:36 +0000

چیرمین نیب فصیح بخاری نے راولپنڈی میں آرمی چیف جنرل اشفاق پرویز کیانی سے ملاقات کی جس میں این ایل سی سکینڈل میں ہونے والی اب تک کی تحقیقات کا جائزہ لیا گیا اور اس بات پر اتفاق کیا گیا کہ آرمی کا جیک برانچ اور نیب کی ٹیم مل کر اس اہم سکینڈل کی تحقیقات کریں گی ،اس سے قبل نیب کواین ایل سی سکینڈل میں مبینہ ملوث فوجی افسران سے تحقیقات کرنے کی اجازت نہیں تھی بلکہ این ایل سی کے صرف ایک سویلین افسر سعید الرحمن سے نیب تحقیقات کر رہا تھا لیکن اب نیب اور جیک برانچ مل کر اس سکینڈل کی تحقیقات کریں گے تاکہ اس میں ملوث ذمہ داروں کو بے نقاب کر کے ان کے خلاف کاروائی عمل میں لائی جا سکے ۔

امریکی گلوکارہ ریحانہ کی تہلکہ خیز ایکشن سے بھرپور ہالی ووڈ فلم بیٹل شپ کل سے سینماگھروں کی زینت بنے گی

TestUser — Thu, 17 May 2012 17:26:26 +0000

سائنس فکشن فلم بیٹل شپ کی کہانی امریکی بحریہ کے جنگی جہازوں کے گرد گھومتی ہے جو جنگی مشقوں کیلئے سمندرکا رخ کرتے ہیں جہاں انہیں سچ مچ کی جنگ کا سامنا کرنا پڑتا ہے۔سمندر کی تہہ میں چھپی روبوٹ نما مخلوق ان کے سامنے تن کر کھڑی ہوجاتی ہے جدید ترین ہتھیاروں سے لیس یہ مشینی مخلوق فوجیوں کو بہت بڑی تباہی سے دو چار کرتی ہے۔ اس کے مہلک ہتھیاروں کے سامنے بحری جہاز کی کوئی حیثیت نہیں ہوتی لیکن فوجی اپنے جوش و جذبے اور ذہانت سے اس خوفناک مشینی مخلوق کا ڈٹ کر مقابلہ کرتے ہیں۔فلم میں گلوکارہ ریحانہ نے اداکاری کے جوپر دکھائے ہیں،فلم کے ہدایت کار پیٹر برگ ہیں۔

امریکی تحقیق کے مطابق کافی پینے سے جسم میں قوت مدافعت پیدا ہوتی ہے اورانسان لمبی عمرپاتا ہے

TestUser — Thu, 17 May 2012 17:23:32 +0000

امریکی ماہرین کا کہنا ہے کہ وہ لوگ جو دن میں چار سے پانچ کپ کافی پیتے ہیں ان میں مختلف بیماریوں میں مبتلا ہو کر جلد ہلاک ہونے کے امکانات کم ہوتے ہیں۔ تحقیق کے مطابق کافی استعمال کرنے والے افراد ذیابطیس،دل کی بیماری،اورڈپریشن سے بھی محفوظ رہتے ہیں۔ کافی استعمال نہ کرنے والے افراد عموماً غیرصحت بخش سرگرمیوں کی طرف جلد مائل ہوتے ہیں۔ ماہرین نے اپنے تجزیے میں پچاس سے اکہتر سال کی عمرکے چار لاکھ لوگوں کو شامل کیا۔

آئی پی ایل میں سیالکوٹ اسٹالین کی شرکت سے پاکستانی کھلاڑیوں کو اپنی صلاحیتوں کا مظاہرہ کرنے کا موقع ملے گا۔ چیف سلیکٹر اقبال قاسم

TestUser — Thu, 17 May 2012 17:13:32 +0000

کراچی میں میڈیا سے گفتگو کرتے ہوئے اقبال قاسم کا کہنا تھا کہ یہ اچھی بات ہے کہ آئی پی ایل میں اب پاکستانی کھلاڑی بھی ایکشن میں نظرآئیں گے۔ انہوں نے کہا کہ ناصر جمشید کی انجری کے حوالے سے ابھی متبادل کھلاڑی کے بارے میں غور نہیں کیا جارہا جب ٹیم مینجمنٹ متبادل مانگے گی تب اس بارے میں سوچیں گے۔ چیف سلیکٹرکا کہنا تھا کہ کسی کھلاڑی کے لیے کوئی موقع آخری نہیں ہوتا تمام کھلاڑی ڈومیسٹک کرکٹ میں واپسی کے لیے کوشش کرتے ہیں جوزیادہ اچھی پرفارمنس دیتا ہے وہ قومی ٹیم تک رسائی حاصل کرلیتا ہے۔

رواں مالی سال کے ابتدائی دس ماہ کے دوران کرنٹ اکاؤنٹ کا خسارہ تین ارب انتالیس کروڑ ڈالر ہو گیا جب کہ گزشتہ مالی سال یہ اکاؤنٹ چھالیس کروڑ ساٹھ لاکھ ڈالر سرپلس تھا۔

TestUser — Thu, 17 May 2012 17:09:12 +0000

اسٹیٹ بینک کے جاری کردہ اعداد و شمار کے مطابق ملکی کرنٹ اکاؤنٹ کا خسارہ تین ارب انتالیس کروڑ چالیس لاکھ ڈالر کی سطح پر پہنچ گیا۔گزشتہ ماہ اپریل کے دوران کرنٹ اکاؤنٹ خسارے میں اکتیس کروڑ تیس لاکھ ڈالر کا مزید اضافہ ہوا ۔ غیر ملکی سرمایہ کاری میں کمی تجارتی خسارہ پینتالیس فیصدتک بڑھنا اور بیرونی ادائیگیوں میں کمی کی وجہ سے گزشتہ مالی سال کا سرپلس اکاؤنٹ اب تین ارب انتالیس کروڑ ڈالر کے خسارے میں تبدیل ہوچکاہے۔معاشی ماہرین کا کہنا ہے کہ برآمدات میں اضافہ اور درآمدات کنٹرول نہ کی گئی تو جاری اکاؤنٹ کا خسارہ مزید بڑھ سکتا ہے۔معاشی تجزیہ کاروں کا کہنا ہے کہ گزشتہ سال کے مقابلے میں ایک ارب ڈالر سے زائد کی ترسیلات زر کے باوجود کرنٹ اکاؤنٹ خسارے کا تین ارب ڈالر سے تجاوز کرنا ملکی معاشی حالات پر انتہائی منفی اثرات ڈالے گا

محکمہ موسمیات کےمطابق آئندہ چوبیس گھنٹوں کے دوران ملک کے بیشترمقامات پر تیز ہواؤں کے ساتھ ہلکی بارش کا امکان ہے۔

TestUser — Thu, 17 May 2012 16:48:37 +0000

محکمہ موسمیات کا کہنا ہے کہ آئندہ چوبیس گھنٹوں کے دوران بالائی پنجاب، بالائی خیبرپختونخوا، کشمیر اور گلگت بلتستان میں کہیں کہیں جبکہ لاڑکانہ اور سکھر ڈویژن میں چند ایک مقامات پر تیز آندھی چلنے کے علاوہ گرج چمک کے ساتھ ہلکی بارش کا امکان ہے۔ محکمہ موسمیات کے مطابق چوبیس گھنٹوں کے دوران ملک میں سب سے زیادہ بارش مالم جبہ میں تئیس ملی میٹر ریکارڈ کی گئی جبکہ سب سے زیادہ گرمی سندھ کے ضلع دادومیں پڑی جہاں درجہ حرارت سینتالیس ڈگری سینٹی گریڈ ریکارڈ کیا گیا۔

ایک حالیہ تحقیق کے مطابق پارک میں سیر کرنے سے اعصابی تناؤ میں کمی اور یادداشت میں اضافہ ہوتا ہے۔

TestUser — Thu, 17 May 2012 16:45:32 +0000

کینیڈا میں ٹورنٹو یونیورسٹی کے بے کریسٹ روٹ مین ریسرچ انسٹیٹیوٹ میں ذہنی امراض پر تحقیق کرنے والے مارک برمن نے ایک مضمون میں لکھا ہے کہ قدرتی ماحول میں سیر کرنے والے ڈیپریشن کے مریضوں کے رویئے میں بہتری دیکھی گئی۔ برمن کا کہنا ہے سیر کے ساتھ سائیکو تھراپی اور دواؤں کا استعمال جاری رہنا چاہیئے۔ انکا کہنا ہے پر سکون قدرتی ماحول میں رہنے سے کام کی زیادتی سے پڑنے والے دباؤ میں کمی ہوتی ہے جس سے مریض بہتر محسوس کرتے ہیں۔

امن کی آشا سراسردھوکہ ہے اس سے دوررہنا چاہیے حکمران چاہے کچھ بھی کہیں ہم سوباربھارت مردہ باد کہیں گے۔ نظریہ پاکستان ٹرسٹ چیرمین مجید نظامی

TestUser — Thu, 17 May 2012 16:33:40 +0000

لاہورمیں نظریہ پاکستان ٹرسٹ کے زیراہتمام امن کی آشا اورہمارے قومی مفادات کے موضوع پرہونے والے سمینارمیں اظہارخیال کرتے ہوئے مجید نطامی نے کہا کہ بھارت کے ساتھ تجارت گناہ کبیرہ ہے،ایسا کرنے والے ملک سے غداری کررہے ہیں۔ انہوں نے کہا کہ کشمیرسے پاکستان آنے والے دریاوں پربھارت ساٹھ سے سترڈیم بنا چکا ہے، ہم نے ان ڈیموں کومیزائل مارکرنہ اڑایا تونہ صرف پاکستان ریگستان بن جائے گا بلکہ ہم پانی پینے سے بھی عاجزآجائیں گے۔ چئیرمین نظریہ پاکستان ٹرسٹ کاکہنا تھا کہ بھارت زندہ باد کہنے والے لیڈرقوم سے معافی مانگیں، ان حکمرانوں سے قوم کوکوئی توقع نہیں ہے۔ مجید نظامی نے کہا کہ ہمیں بھارت کے آلوپیازاوردیگراشیا کھا نے کی بجائے غیرت مندی کا مظاہرہ کرنا ہوگا۔
سیمینارسے خطاب کرتے ہوئے سابق چیرمین واپڈا لیفٹیٹنٹ جنرل ریٹائرڈ ذوالفقارعلی خان کا کہنا تھا کہ بھارت ایک طرف امن کی آشا کا نعرہ لگا کردوستی کی پینگیں بڑھا رہا ہے تودوسری جانب پاکستان کودہشت گرد قراردیکردوہرے معیارکا مظاہرہ کررہا ہے۔ انہوں نے کہا کہ محب وطن قوتوں کوامن کی آشا کی سازش سے ہوشیاررہنا ہوگا۔ سمینار سے خطاب کرتے ہوئے کرنل ریٹائرڈ جشید ترین نے کہا کہ بھارت کبھی بھی پاکستان سے ایٹمی جنگ نہیں کرے گا قوم کواپنے حوصلے بلند رکھنے چاہیں۔
سیمینارسے نظریہ پاکستان ٹرسٹ کے وائس چیرمین ڈاکٹررفیق احمد ، ڈاکٹرایم اے صوفی ، فرید احمد پراچہ ، محترمہ مہنازرفیع ، محترمہ بشرح رحمان ،بریگیڈیرظفراقبال، برگیڈیرمحمد یوسف ، غلام نبی لون ، مولانا احمد علی قصوری ،جسٹس ریٹائرڈ مینراحمد مغل ،جسٹس ریٹائرڈ نذیراحمد ، برگیڈیرریٹائرڈ فاروق حمید خان ، مفتی محمد شفیع جوش ،انجینرسلمان نجیب خان اورپیراعجازہاشمی سمیت دیگرمقررین نے خطاب کیا۔ مقررین کا کہنا تھا امن کی آشا اکھنڈ بھارت کا دوسرا نام ہے اوریہ سازش کسی صورت کامیاب نہیں ہونے دی جائے گی۔ مقررین نے کہا کہ نئی نسل کونظریہ پاکستان سے روشناس کرنے کی کوشیشوں کومزید تیزکرنا ہوگا سمینارمیں واپڈا کے سابق چیرمین لیفٹیٹنت جنرل رٹیائرڈ ذوالفقارکی قیادت میں پانی کے مسئلے پرایک کمیٹی تشکیل دینے کا بھی اعلان کیا گیا۔

نیٹو کی سپلائی بحال کرنے کے معاملے میں حکومت ساڑھے چھتیس کروڑڈالرز میں بک گئی ہے۔ عمران خان

TestUser — Thu, 17 May 2012 16:27:36 +0000

یہ بات انہوں نے برطانیہ روانگی سے قبل لاہور ایئرپورٹ پرمیڈیا سے گفتگو کرتے ہوئے کہی۔ ان کا کہنا تھا کہ پارلیمنٹ کی قراردادوں پر عمل نہیں کیا جارہا اوراب یہ بالادست ادارہ بھی نہیں رہا۔ انہوں نے کہا کہ نیٹوسپلائی بحال ہوئی توتحریک انصاف جلد آئندہ کے لائحہ عمل کا اعلان کرے گی، ملک میں بڑھتی ہوئی کرپشن پر تنقید کرتے ہوئے عمران خان نے کہا کہ عوام کرپٹ حکمرانوں کا راستہ نہ روکنے کی قیمت چکا رہے ہیں آج ملک کا ہرادارہ خسارے میں جارہا ہے۔ تحریک انصاف کے چئیرمین نے امریکہ سے مطالبہ کیا کہ وہ قبائلی علاقوں میں ڈرون حملے بند کرے۔