پاکستان اور سعودی عرب عالمی اور علاقائی معاملات میں یکساں موقف رکھتے ہیں۔ صدر مملکت

پاکستان اور سعودی عرب عالمی اور علاقائی معاملات میں یکساں موقف رکھتے ہیں۔ صدر مملکت

صدر مملکت ممنون حسین نے کہا ہے کہ دہشت گردی کے ناسور سے نمٹنے کے لیے پاکستان تمام علاقائی اور عالمی کوششوں کی حمایت کرتا ہے، اس سلسلے میں پاکستان اور سعودی عرب کے درمیان قریبی تعاون ہے۔صدر مملکت نے یہ بات سعودی عرب کے لیے نامزد سفیر وائس ایڈمرل( ریٹائرڈ) خان ہشام بن صدیق سے بات چیت کرتے ہوئے کہی جنھوں نے جمعہ کو ایوان صدر میں ان سے ملاقات کی۔ صدر مملکت نے نامزد سفیر کو نئی ذمہ داری ملنے پر مبارک باد دی اور توقع ظاہر کی کہ وہ اپنی بہترین صلاحیتوں سے کام لے کر دونوں برادر ملک انتہائی قریبی دوستانہ تعلقات میں مزید گہرائی اور گرم جوشی پید ا کریں گے۔ انہوں نے کہا کہ دونوں ملک تمام عالمی اور علاقائی معاملات میں یکساں موقف رکھتے ہیں اور عالمی فورموں پر ایک دوسرے کے ساتھ تعاون کرتے ہیں جو دونوں برادر ملکوں کے درمیان انتہائی قریبی اور برادرانہ تعلقات کو ظاہر کرتا ہے۔ صدر مملکت نے نامزد سفیر کو ہدایت کی کہ وہ سعودی سرمایہ کاروں کو پاکستان میں مختلف منصوبوں میں سرمایہ کاری پر متوجہ کریں اور باہمی تجارت میں مزید اضافے کے لیے کام کریں۔ صدر مملکت نے کہا کہ سعودی عرب میں مقیم پاکستانیوں کی فلاح و بہبود کو ترجیحات میں رکھاجائے اور پاکستانیوں کے ساتھ قریبی روابط استوار کر کے ان کے مسائل کے حل کے لیے کام کیا جائے۔ انھوں نے مدینہ منورہ میں مقیم پاکستانی بچوں کی تعلیم کے معاملے میں خصوصی دلچسپی لینے کی ہدایت کی۔نامزد سفیر وائس ایڈمرل (ر) خان ہشام بن صدیق نے کہا کہ حکومتِ پاکستان نے ان پر جو اعتماد کیا ہے،وہ اپنی بہترین صلاحیتوں کے ساتھ اس پر پورا اترنے کی کوشش کریں گے۔

Most Popular