سندھ حکومت کے خاتمے اور صوبے میں گورنر راج سمیت صوبے میں وزیراعلیٰ کی تبدیلی کے مطالبے پر پیپلزپارٹی رہنما تحریک انصاف پر برس پڑے اور کہا کہ سندھ میں مصنوعی گورنر راج کی کوشش پہلی بار نہیں ہے، سندھ کی حکومت گرانے آنا چاہتے ہیں تو آجائیں، سندھ حکومت گرانے والے اپنی بھی خیر منائیں۔پی ٹی آئی والے وزیراعظم کو فرشتہ بناکرپیش کرتے تھے۔آج ان کے چھپے اثاثے سامنے آرہے ہیں۔ ان خیالات کا اظہارپی پی رہنما مولا بخش چانڈیو نے حیدرآباد میں ایک پریس کانفرنس سے خطاب کرتے ہوئے کیا۔مولا بخش چانڈیو نے وفاقی وزیراطلاعات کو شدیدتنقید کا نشانہ بنایا اور کہا کہ ماضی میں وفاق سے سندھ میں ڈاکو آئے ۔بھانڈ پھر سرگرم ہوگئے ہیں، ایک وزیر کہتا ہے صوبے کا پانی بند کردیں گے،لیکن یہ کام آسان نہیں ہے۔عدالت نے بھی کہا صرف جے آئی ٹی کی رپورٹ پر حکومت گرانے نہیں دیں گے، اگر سندھ کی حکومت گرانے کی کوشش کی، تو آپ بھی نہیں رہیں گے، وزیراعلیٰ سندھ پر چیئرمین پیپلزپارٹی اور عوام کا اعتماد ہے، انہیں ہٹانے کا بیان بھی غلط بات ہے۔پی پی رہنما نے مزید کہا کہ تحریک انصاف کا انداز حکومت صحیح نہیں ہے، پی ٹی آئی کی حکومت عوام سے کیے وعدے پورے کرے۔انہوں نے پی ٹی آئی کو چیلنج کرتے ہوئے کہا کہ پیپلزپارٹی سے ٹکرانا ہے تو ہم تیار ہیں، یہ پرائی طاقت پر اندھے بنے ہوئے ہیں، حکومت اگر باز نہ آئی تو نتائج جلد سامنے آجائیں گے اور حکومت نے کوئی ایسی حرکت کی تو گمنام ہوجائے گی۔