ملک کے زیادہ ترعلاقوں میں موسم خشک، تاہم کشمیر میں چند ایک مقامات پر گرد آلود ہوائیں اور گرج چمک کے ساتھ ہلکی بارش کا امکان ہے۔
محکمہ موسمیات کا کہنا ہے کہ کاشت کے اکثر علاقوں میں آئندہ چند روز کے دوران بارش کا کوئی امکان نہیں۔ گزشتہ چوبیس گھنٹوں کے دوران ملک کے زیادہ تر علاقوں میں مطلع جزوی طور پر ابرآلود رہا تاہم راولپنڈی ڈویژن، مالاکنڈ، ہزارہ، کشمیر اور گلگت بلتستان میں چند ایک مقامات پر گرج چمک اور تیز ہواؤں کے ساتھ بارش ہوئی۔ سب سے زیادہ بارش میرخانی میں آٹھ ملی میٹر ریکارڈ کی گئی۔ گزشتہ روز اسلام آباد میں پولن کی مقدار اٹھائیس ہزار تریپن فی کیوبک میٹر ریکارڈ کی گئی جبکہ ملک میں زیادہ سے زیادہ درجہ حرارت مٹھی اور لسبیلہ میں اکتالیس ڈگری سینٹی گریڈ رہا،اس کے علاوہ نوابشاہ، تربت اور حیدر آباد میں چالیس، کراچی، لاہور اور فیصل آباد میں چونتیس، اسلام آباد تینتیس، مظفرآباد چھبیس، پشاور اٹھائیس، ملتان پینتیس، کوئٹہ ستائیس، گلگت چوبیس اور مری میں سولہ ڈگری سینٹی گریڈ ریکارڈ کیا گیا۔
