وزیراعظم کی اسمگلنگ میں ملوث عناصر کیخلاف سخت کارروائی کی ہدایت
وزیر اعظم عمران خان کی زیر صدارت اسلام آباد میں انسداد اسمگلنگ اقدامات پر اعلیٰ سطح کا اجلاس ہوا۔ اجلاس میں وزیراعظم کو اسمگلنگ کے حوالے سے بریفنگ دیتے ہوئے بتایا گیا کہ اسمگل شدہ تیل کی فروخت سے معیشت کو 100 سے 150 ارب روپے سالانہ نقصان پہنچ رہا ہے۔ ملک میں 2094 پیٹرول پمپس اسمگل شدہ تیل کی فروخت میں ملوث ہیں۔ وزیراعظم نے کہا کہ اسمگلنگ کی وجہ سے ملکی معیشت کو ناقابل تلافی نقصان پہنچ رہا ہے۔ انسداد اسمگلنگ اقدامات سے حکومتی محصولات میں اضافہ ہوگا۔ محصولات میں اضافے کا فائدہ غریب عوام کو پہنچے گا۔ وزیراعظم نے حکام کو اسمگلنگ میں ملوث عناصر کے خلاف انتہائی سخت اقدامات کرنے کی ہدایت کی۔ اجلاس میں وفاقی وزیر خزانہ حفیظ شیخ، وزیر اطلاعات شبلی فراز، مشیر تجارت رزاق داؤد اور معاون خصوصی شہزاد اکبر کی شرکت کی جبکہ ویڈیو لنک سے صوبائی چیف سیکریٹریز، ایف سی کے پی اور بلوچستان کے آئی جیز بھی شریک ہوئے۔
