ایم کیو ایم کا موقف الیکشن کمیشن کے سامنے رکھا ہے، جو فیصلہ ہوگاعمل کریں گے۔مراد علی شاہ
وزیراعلیٰ سندھ مراد علی شاہ نے کہا ہے کہ حلقہ بندیوں پر ایم کیو ایم کا موقف الیکشن کمیشن کے سامنے رکھا ہے اس پر جو الیکشن کمیشن فیصلہ کرے گا عمل کریں گے۔سیہون ائیرپورٹ پر میڈیا سے گفتگو میں مراد علی شاہ نے کہا کہ سب کو اپنا موقف پیش کرنے کا حق ہے اور حلقہ بندیوں سے متعلق ایم کیو ایم کا اپنا موقف ہے البتہ اس حوالے سے خالد مقبول صدیقی اور گورنر کا بیان نہیں سنا، ایم کیو ایم کا موقف الیکشن کمیشن کے سامنے رکھا ہے، اب الیکشن کمیشن جو فیصلہ کریگا اس پر عمل کریں گے۔مراد علی شاہ کا کہنا تھا کہ معیشت میں مسائل ہیں اور ہمیں مشکل فیصلے کرنے پڑیں گے، ہمارا امپورٹ بل ہمارا بہت بڑھ گیا ، ہم سب کو اپنی کمر کسنی ہوگی، وزیراعظم کی طرف سے کچھ وفاقی وزرا ء کراچی آئے تھے جن سے ہماری میٹنگ ہوئی، مجھے یقین کے کہ وزیراعظم کے پاس تجربہ کار ٹیم ہے، معیشت کی بہتری میں صوبوں سے جو مدد چاہیے ہم بالکل حاضر ہیں۔
