بھارتی ٹیم کو دھچکا، اہم کھلاڑی ورلڈ کپ سے باہر
ورلڈ کپ 2019 میں بھارتی ٹیم شیکھر دھون کے بعد وجے شنکر کی خدمات سے بھی محروم ہوگئی، وجے شنکر پریکٹس کے دوران پاؤں میں چوٹ لگنے سے زخمی ہوئے تھے۔ بھارتی کرکٹ بورڈ کے اعلامیے کے مطابق وجے شنکر کے زخم ٹھیک ہونے میں کم از کم تین ہفتے درکار ہوں گے۔ آل راؤنڈر وجے شنکر کی جگہ بھارتی ٹیم میں مانک اگروال کو شامل کرلیا گیا ہے، دھون کے بعد وجے شنکر انجرڈ ہوکر میگا ایونٹ سے باہر ہونے والے دوسرے بھارتی کھلاڑی ہیں۔ وجے شنکر نے پاکستان کے خلاف میچ میں بہترین آل راؤنڈ کارکردگی کا مظاہرہ کیا تھا۔ اٹھائیس سالہ مانک اگروال ٹاپ آرڈر بلے باز ہیں اور وہ بھارت کی جانب سے دو ٹیسٹ میچز کھیل چکے ہیں اور ورلڈ کپ میں ان کا ون ڈے میچز میں ڈیبیو ہونے جارہا ہے۔ واضح رہے کہ گزشتہ روز بھارتی ٹیم نے انگلینڈ کے خلاف میچ میں وجے شنکر کی جگہ رشبھ پنٹ کو شامل کیا تھا۔ انگلینڈ نے اس اہم میچ میں کامیابی حاصل کرکے سیمی فائنل کے لیے راہ ہموار کرلی ہے، بھارت کی یہ میگا ایونٹ میں پہلی شکست تھی۔ انگلیںڈ سے شکست پر بھارتی میڈیا اور مداحوں کی جانب سے بھارتی ٹیم پر شدید تنقید کی جارہی ہے، مداحوں کی جانب سے بھارت کی شکست پر شکوک و شبہات کا اظہار کیا جارہا ہے۔