سندھ کے وزیر اطلاعات، ٹرانسپورٹ و ماس ٹرانزٹ شرجیل انعام میمن نے کہا ہے کہ ملک میں پی ٹی آئی کی حکومت چور دروازے سے آئی تھی، عمران خان ملک کو پھلتا پھولتا نہیں دیکھنا چاہتے۔ پریس کانفرنس کے دوران گفتگو کرتے ہوئے انہوں نے کہا کہ اس وقت ملک میں سب سے بڑا چیلنج مہنگائی ہے الیکشن نہیں، پاکستان کو دیکھنا ہے کہ مہنگائی سے کس طرح نمٹا جائے، پی ٹی آئی کی نا اہلی کی ملکی تاریخ میں کوئی نظیر نہیں ملتی، پی ٹی آئی نے آئی ایم ایف سے بنا کسی پلان کے وعدے کئے اور ان سے مکر گئے، یہاں ان کا یوٹرن کام نہیں آیا۔ صوبائی وزیر اطلاعات نے کہا کہ 3 سال میں سیکرٹری فنانس اور اسٹیٹ بینک کے گورنر کو بار بار تبدیل کیا گیا، جب نئے ٹیکس لگانے تھے تو پی ٹی آئی حکومت نے نہیں لگائے کیونکہ انہیں نظر آ رہا تھا وہ جا رہے ہیں، سندھ حکومت جواب دہ ہے ہم لوگوں کو ریلیف دے رہے ہیں۔ انہوں نے کہا کہ وزیر خوراک کو وزیر اعلیٰ سندھ نے گندم کی خریداری جلدی کرانے کی ہدایت کی اور ہر ضلع میں پرائس کنٹرول کو یقینی بنایا جا رہا ہے، عمران خان سوچی سمجھی سازش کے تحت ملک کو انتشار کی جانب دھکیل رہا ہے اور اب یہ عیاں ہو چکا ہے کہ عمران خان کسی ایجنڈے پر کام کر رہا ہے۔

آئی ایم ایف کی تمام شرائط کو من و عن تسلیم کرلیا ہے، وزیراعظم