چیئرمین پی سی بی کا سیکرٹری بھارتی کرکٹ بورڈکو خط
چیئرمین پی سی بی شہریار خان کی جانب سے بھارتی کرکٹ بورڈ کو بھیجے جانے والے خط میں شہریار خان کا کہنا ہے کہ سیاست کو کھیل سے الگ رکھنا چاہیئے جبکہ پاک بھارت سیریز نے ہمیشہ دونوں ملکوں کے تعلقات میں بہتری لانے میں اہم کردار ادا کیا۔ شہریار خان نے اپنے خط میں بھارتی کرکٹ بورڈ کے سیکرٹری انوراگ ٹھاکر کو یہ بھی یاد دلایا ہے کہ جب وہ دو ہزار چار میں بھارتی ٹیم کے ساتھ پاکستان آئے تھے تو انہوں نے خود پاکستانی عوام کی والہانہ محبت دیکھی تھی۔ شہریار خان نے کہا کہ پی سی بی نے پاک بھارت سیریز کے نشریاتی حقوق کے معاملے پر بھارتی کرکٹ بورڈ کے تحفظات بھی دور کر دیئے ہیں لہذا دونوں ملکوں کے درمیان ٹیسٹ سیریز کا انعقاد کرایا جائے۔ اس سے قبل بھارت نے پاکستان کے ساتھ آٹھ سال میں چھ ٹیسٹ سیریز کھیلنے کے بارے میں مفاہمت کی یادداشت پر دستخط کر رکھے ہیں اور اس سلسلے کی پہلی سیریز رواں سال دسمبر میں متحدہ عرب امارات میں کھیلی جانی ہے۔ دونوں ملکوں کے درمیان تعلقات میں کشیدگی نے سیریز کے امکانات تقریباً ختم کردیئے ہیں۔
