پاکستان چین اسٹریٹجک تعلقات میں وسعت دہائیوں پر محیط دیرینہ دوستی کا منہ بولتا ثبوت ہے۔شہبازشریف
وزیر اعظم میاں محمد شہبازشریف نے کہا ہے کہ پاکستان چین کے اسٹریٹجک تعلقات میں وسعت دونوں ممالک کی دہائیوں پر محیط دیرینہ دوستی کا منہ بولتا ثبوت ہے۔کراچی میں گزشتہ روز K3 منصوبے کا افتتاح چین پاکستان کے تعلقات میں مزید استحکام کا عکاس ہے۔یہ پاور پلانٹ نہ صرف پاکستان کی بڑھتی ہوئی بجلی کی ضروریات پورا کرے گا بلکہ کم لاگت اور ماحول دوست بجلی فراہم کرے گا۔کے تھری منصوبہ پاکستان کی طویل مدتی معاشی ترقی میں کلیدی کردار ادا کرے گا۔جمعہ کے روز وزیر ِ ِ اعظم محمد شہباز شریف سے اسلام آباد میں چائنہ نیشنل نیوکلئیر کارپوریشن کے وفدنے ملاقات کی۔وفد کی وائس چیئرمین چائنہ نیشنل نیوکلئیر کارپوریشن لیو جنگ (Liu Jing)، پاکستان میں چینی سفارتخانے کی ناظم المور پانگ چن شوئی (Pang Chunxue) کی قیادت میں وزیرِ اعظم سے ملاقات ہوئی۔ملاقات کے دوران وفاقی وزرا ء سینیٹر محمداسحاق ڈار، احسن اقبال، انجینئرخرم دستگیر خان، مشیرِ وزیرِ اعظم احد خان چیمہ، معاونینِ خصوصی سیدطارق فاطمی، طارق باجوہ، جہانزیب خان اور متعلقہ اعلی حکام نے شرکت کی۔ ملاقات کے دوران وزیر اعظم کو بتایا گیا کہ چین پاکستان میں نیوکلئیر انرجی کے شعبے میں سرمایہ کاری بڑھانے میں دلچسپی رکھتا ہے اور اس حوالے سے جلد وفود کی سطح پر ملاقاتوں کا آغاز کیا جائے گا جس کا وزیر ِ اعظم نے خیر مقدم کیا۔
