سری لنکا کے صدر گوٹابایا راج پکشے نے پیر کو آدھی رات کومقررہ وقت سے تقریبا چھ ماہ پہلے پارلیمنٹ تحلیل کر دی اور 25 اپریل کو وسط مدتی انتخابات کرانے کا اعلان کر دیا ۔غیر ملکی میڈیا ذرا ئع کے مطابق سری لنکن صدارتی دفتر سے جا ری بیان میں بتا یا ہے کہ ریاست کے صدر راج پکشے نے پیر کو آدھی رات سے پارلیمنٹ تحلیل کر دی ہے اور 14 مئی کو نئے پارلیمنٹ کے اجلاس بلایا ہے۔ انتخابات کے لئے امیدوار 12 سے 19 مارچ کے درمیان نامزدگی داخل کر سکتے ہیں۔خیال رہے کہ سری لنکا میں پارلیمنٹ تحلیل کرنے کے لئے اس کی مدت کم سے کم ساڑھے چار سال تک مکمل ہونا لازمی ہے۔ موجودہ پارلیمنٹ کا قیام یکم ستمبر 2015 کو عمل میں آیا تھا۔ انتخابات ہونے تک ملک میں وزیر اعظم مہندا راج پکشے کی قیادت میں ایک نگراں حکومت کام کرتی رہے گی۔