اسلام آباد ہائیکورٹ نے پاکستان تحریک انصاف سے تعلق رکھنے والی تین اراکین قومی اسمبلی کے متعلق اپنا فیصلہ سنا دیا ۔ ذرا ئع کے مطابق عدالت نے پی ٹی آئی خواتین رہنما کنول شوزب، ملیکہ بخاری اور تاشفین صفدر کی اہلیت کے خلاف درخواستیں مسترد کر کے خارج کر دیں۔ عدالت نے تینوں کو اہل قرار دے دیا۔واضح رہے کہ پاکستان مسلم لیگ کی طاہرہ بخاری، شائستہ پرویز اور عبداللہ خان کی جانب سے دائر کردہ درخواستوں پر حتمی دلائل سننے کے بعد اسلام آباد ہائی کورٹ کے جسٹس عامر فاروق نے فیصلہ محفوظ کیا تھا۔دائر درخواست میں الزام عائد کیا گیا تھا کہ ملیکہ بخاری کاغذات نامزدگی جمع کرانے کی آخری تاریج تک دوہری شہریت رکھتی تھیں۔ تاشفین صفدر کے متعلق دائر درخواست میں بھی کہا گیا تھا کہ انہوں نے بھی اپنی دوہری شہریت سے متعلق معلومات الیکشن کمیشن آف پاکستان سے چھپائی تھیں۔کنول شوزب کے متعلق دائر درخواست میں کہا گیا تھا کہ انہوں نے اسلام آباد ہائی کورٹ سے ووٹ تبدیلی سے متعلق غلط بیانی کی تھی۔پاکستان تحریک انصاف سے تعلق رکھنے والی تینوں خواتین مخصوص نشستوں پر پی ٹی آئی کے ٹکٹ پہ اراکین قومی اسمبلی منتخب ہوئی تھیں۔

ترکی میں افغان حکومت اور طالبان کے مابین ہونے والی مجوزہ امن کانفرنس ملتوی