عمران خان کہتے ہیں پانامہ لیکس بھولنے والے نہیں،معاملے کو منطقی انجام تک پہنچائیں گے،نواز شریف الیکشن جیتنے کیلئے اربوں روپے بانٹے گا
لاہور کے علاقے شاہدرہ سے احتساب ریلی کے آغاز کے موقع پر خطاب کرتے ہوئے چیئرمین تحریک انصاف عمران خان کا کہنا تھا کہ سیالکوٹ کا رنگ باز خواجہ آصف کہتا ہے کہ میاں صاحب تھوڑے ہی دن میں لوگ پاناما لیکس کو بھول جائیں گے،لیکن مسلم لیگ ن والے یاد رکھیں عوام اور نہ ہی وہ پاناما لیکس کو بھولنے دیں گے ۔وزیر اعظم چاہتے ہیں کہ اپنے قانون کے تحت احتساب کریں اور وہ اپنے آپ کو بچانے کیلئے ملکی ادارے تباہ کر رہے ہیں،عمران خان نے کہا کہ ہر جمہوریت میں وزیر اعظم جوابدہ ہوتا ہے لیکن نواز شریف پچھلے پانچ مہینے سے پہلو تہی کر رہا ہے،نواز شریف دنیا کا وہ واحد سیاستدان ہے جس نے سپریم کورٹ پر حملہ کرایا، سیاستدانوں کی خریدو فروخت شروع کی، میڈیا ہاؤسز کو خریدنے کی کوشش کی۔ نواز شریف نے ہمیشہ ہی رشوت دے کر لوگوں کو خریدا یہ وہ شخص ہے جس نے آرمی چیف کو مری بلا کر بی ایم ڈبلیو کی چابی پکڑا دی۔
عمران خان نے کہا کہ وہ نیب کے چیئرمین کو کہیں گے کہ مرنے کے بعد تم نے نواز شریف کو نہیں بلکہ اللہ کو جواب دینا ہے۔میں جانتا ہوں کہ ہر مہینے کتنے کروڑ روپے تم دبئی بھیجتے ہو۔ میں پوچھتا ہوں کہ کیا آپ کا دنیا میں آنے کا مقصد جانوروں کی طرح صرف بچے پیدا کرنا ہے ۔ ایف بی آر کے چیئرمین اگر تم میں غیر ت ہے تو پاناما پیپرز میں نام آنے والے سب لوگوں کو نوٹس بھیجو۔ایف آئی اے سے پوچھتا ہوں کہ یہ کہاں کا انصاف ہے کہ ایک غیر ملکی اخبار میں خبر چھپتی ہے اور آپ پاکستانی میڈیا ہاؤس کو بند کردیتے ہیں۔عمران خان نے کہا کہ الیکشن کمیشن آف ن لیگ میں پوچھتا ہوں کہ آخر کتنی دیر تک آپ ن لیگ کی بی ٹیم بنے رہیں گے۔ہم اداروں پر پریشر نہیں ڈال رہے ۔ ہم یہ کہہ رہے ہیں کہ ادارے بلاتفریق اپنی ذمہ داریاں پوری کریں،،،
