وزیر مملکت پارلیمانی امور علی محمد خان نے کہا ہے کہ شہباز شریف زرداری کی عدالت میں نیب کو دفن کرنے گئے تھے،نواز شریف علاج کرائیں اور واپس آئیں، نوازشریف واپس نہیں آتے تو شہباز شریف کو جواب دینا پڑے گا، نواز شریف کو چاہیے عدالتی فیصلے کا احترام کرتے ہوئے سرنڈر کریں،سٹیٹس کو جماعتیں ملک میں تبدیلی نہیں چاہتی۔اسلام آباد میں وزیر مملکت پارلیمانی امور علی محمد خان نیفرخ حبیب کے ہمراہ الیکشن کمیشن کے باہر میڈیا سے گفتگو کرتے ہوئے کہا کہ سیاسی مخالف جماعتوں کی جانب سے پی ٹی آئی سے سوال کیا گیا اور اکائونٹس اور غیر ملکی فنڈنگ کی تفصیلات مانگی گئی تھیں۔علی محمد خان نے کہا کہ ہم نے اپنی تمام تفصیلات الیکشن کمیشن کو دے دی ہیں اور ہم نے بھی درخواست دی ہے کہ دیگر جماعتیں ن لیگ، پیپلز پارٹی، جماعت اسلامی بھی تفصیلات دیں۔انہوں نے کہا کہ ان جماعتوں نے اپنے اکائونٹس کی تفصیلات ابھی تک نہیں دیں جبکہ کچھ سیاسی جماعتوں نے اپنے غیر ملکی اکائونٹس کی تفصیلات دینے کی تکلیف ہی نہیں کی۔انہوں نے کہا کہ کچھ جماعتوں نے تفصیلات دیں جس میں سقم نظر آئے، ن لیگ، پیپلز پارٹی اپنے آڈٹ اکائونٹ کی تفصیلات پیش کریں۔انہوں نے کہا کہ ہم سمجھے کہ شہباز شریف وہ وعدہ پورا کرنے گئے ہیں جو انہوں نے زرداری سے متعلق کیا تھا جبکہ شہباز شریف تو زرداری کی عدالت میں نیب کو دفن کرنے گئے تھے۔اس موقع پرفرخ حبیب نے کہا کہ پارٹی فنڈنگ کیس میں دودھ کا دودھ اور پانی کا پانی ہونا چاہیے، ن لیگ، پیپلز پارٹی نے پارٹی اکائونٹس ٹی ٹیز اور منی لانڈرنگ کیلئے استعمال کیے، ایف اے ٹی ایف کا بھی یہی مطالبہ ہے کہ اپنے اکائونٹس میں شفافیت لائیں، جو ماضی میں ہوتا رہا اس سے نظریں نہیں چرائی جاسکتیں، چاہتے ہیں تمام جماعتوں کے اکائونٹس کی جانچ پڑتال ہو، اپوزیشن چاہتی ہے پاکستان بلیک لسٹ میں چلا جائے، اپوزیشن حکومت کو ایف اے ٹی ایف قوانین پر بلیک میل کرتی ہے۔

‏غریب آدمی کی عزت نفس کا خیال نہیں رکھا گیا، حماد اظہر