پنجاب میں سود لینے پر 10 سال کی سزا مقرر کی ہے: وزیراعلیٰ پنجاب چوہدری پرویز الہیٰ
وزیراعلیٰ پنجاب چوہدری پرویز الہیٰ کا کہنا ہے کہ صوبے بھر میں سود کے نظام کے خاتمے کیلئے اقدامات کر رہے ہیں، نجی سطح پر سود لینے پر 10 سال کی سزا مقرر کی گئی ہے۔اتوار چار دسمبر کو وزیراعلیٰ پنجاب سے صدر وفاق المدارس العربیہ کی قیادت میں علمائے کرائے کے وفد نے لاہور میں ملاقات کی۔ ملاقات میں اسلام کے بنیادی اصولوں کی ترویج اور شرعی قوانین کے نفاذ سے متعلق گفتگو کی گئی۔ملاقات میں علمائے کرام نے دین کی خدمت کیلئے کیے گئے اقدامات پر پرویز الہٰی کو خراج تحسین پیش کیا۔مفتی تقی عثمانی کا کہنا تھا آپ دین کی خدمت کر رہے ہیں، علما آپ کے لیے دعاگو ہیں، دین کی خدمت کی برکات سے آپ کی حکومت چلے گی۔ملاقات میں گفتگو کرتے ہوئے پرویز الہیٰ کا کہنا تھا کہ وزارت اعلیٰ سنبھالنے کے بعد فوراً قرآن بورڈ کو بحال کیا، پنجاب میں طلبہ کیلئے ناظرہ اور ترجمہ قرآن لازمی کردیا گیا ہے۔انہوں نے یہ بھی کہا کہ نجی سطح پر سود لینے پر 10 سال کی سزا مقرر کی گئی ہے، جب کہ عقیدہ ختم نبوت کیلئے قوانین سازی کی گئی ہے۔ اس سلسلے میں پہلی مرتبہ نکاح نامے میں عقیدہ ختم نبوت شامل کیا گیا ہے۔
علمائے کرام کے کردار کو سراہتے ہوئے پرویز الہیٰ کا کہنا تھا کہ علما کی دعاؤں اور برکتوں سے سارے کام سیدھے ہو رہے ہیں۔ بچوں کا ذہن دین کی طرف راغب ہو گا تو قوم بنے گی۔
