عوام کو لوٹنے والے فصلی بٹیروں کے خلاف شکنجہ سخت کیا جائے گا۔چیئرمین نیب

چیئرمین قومی احتساب بیورو (نیب)لیفٹیننٹ جنرل (ر) نذیر احمد نے کہا ہے کہ لوگوں کو لوٹنے والے فصلی بٹیروں کے خلاف شکنجہ سخت کیا جائے گا ، نیب کے بارے میں سست روی کا تاثر کسی حد تک صحیح ہے، کوئی فرد واحد یا ادارہ ملک کو کرپشن سے آزاد نہیں کر سکتا، معاشرے کے تمام طبقات کو ملکر بدعنوانی کے خاتمے میں کردار ادا کرنا ہوگا۔لاہور میں انسداد بدعنوانی ڈے کے حوالے سے تقریب سے خطاب کرتے ہوئے چیئرمین نیب نذیر احمد نے کہا کہ ہائوسنگ سوسائٹیز سے متاثرہ افراد کو لوٹی ہوئی رقوم واپس کر رہے ہیں ، ہر 10میں سے 7لوگ کسی نہ کسی ہائوسنگ سکیم کے فراڈ کا شکار ہیں، نیب کی کوشش یہی ہے کہ لوگوں سے کوئی زیادتی نہ ہو، عوام کو لوٹنے والے فصلی بٹیروں کے خلاف شکنجہ سخت کیا جائے گا،سوسائٹیز کے متاثرین کو ان کی رقوم اور پراپرٹیز کی واپسی ہی نیب کا فلسفہ ہے، ابھی بھی منزل بڑی دور ہے، کافی متاثرین حق کے انتظار میں بیٹھے ہیں، ہم یہ کام بڑی تاخیر سے کر رہے ہیں، بڑی جلدی کر لینا چاہیے تھا۔انہوںنے کہا کہ یونیورسٹیز میں طلبا میں آگاہی پھیلارہے ہیں، لوگوں میں اس حوالے سے آگاہی کا بڑا مثبت رول ہے، عوام میں منظم آگاہی مہم شروع کرنے کا مقصد بھی یہی ہے، آگاہی مہم کا حصہ بننے والے نوجوان نیب کے ایمبیسیڈر بنیں گے۔لیفٹیننٹ جنرل ریٹائرڈ نذیر احمد نے کہا کہ نیب کے بارے میں سست روی کا تاثر کسی حد تک صحیح ہے، نیب کو خوف اور ہراسگی کا تاثر دور کرنا چاہیے، ہمیں چور کوپکڑنا ہے پورے محلے کو تنگ نہیں کرنا،ماضی میں مہذب رویے کی کمی رہی ہے، یقین دلاتا ہوں کہ لوگوں سے مہذب طریقے سے پیش آئیں گے۔انہوں نے کہا کہ فراڈ کا لفظ ہٹا کر متاثر کیا ہے، کوشش کر رہے ہیں ملزم کو ملزم کہنے کے بجائے رسپانڈنٹ کہا جائے، نیب آپ کا محافظ اور معاون ہے، ہم نیب کو پروفیشنل ادارہ بنائیں گے،نیب قوانین کے بننے سے ہماری ذمہ داریاں بڑھ گئی ہیں، امید ہے التوا کے کیسز کو حل کر لیں گے۔چیئرمین نیب نے کہا کہ کوئی فرد واحد یا ادارہ ملک کو کرپشن سے آزاد نہیں کر سکتا، معاشرے کے تمام طبقات کو ملکر بدعنوانی کے خاتمے میں کردار ادا کرنا ہوگا، چاہوں گا تمام سٹیک ہولڈر اکٹھے ہو کر اس خیر کے کام میں حصہ ڈالیں۔ انہوں نے کہا کہ ہم انویسٹر کی رقوم اور حقوق کو محفوظ بنائیں گے، کوشش ہے مزید لوگ اس دھوکہ دہی کا شکار نہ بنیں، لوگ اپنی رقوم مناسب جگہ پر مشاورت کے بعدانویسٹ کریں، آئے روز لوگ اس جھانسے کا شکار ہو رہے ہیں۔