معروف اور مشہور کمپوزر شیراز اپل، جو بھارت اور پاکستان میں اپنی لاجواب موسیقی کے لیے شہرت رکھتے ہیں، نے حال ہی میں ایک دل میں اتر جانے والی قوالی ”یا مصطفیٰ“ ترتیب دی ہے۔ یہ قوالی خصوصی طور پر اعجاز گوشی کے لیے تیار کی گئی ہے، جو ایک باصلاحیت پاکستانی نژاد امریکی گلوکار ہیں۔ اعجاز گوشی نہ صرف اپنی شاندار آواز کے لیے مشہور ہیں، بلکہ پیشے کے لحاظ سے ایک ماہر امراضِ قلب (کارڈیالوجسٹ) بھی ہیں۔ وہ امریکہ میں مسلمانوں کی حمایت کرنے والی تنظیم APPAC کے بانی اور سربراہ ہیں اور اپنی انسان دوست سرگرمیوں اور فلاحی کاموں کے سبب وسیع پیمانے پر پہچانے جاتے ہیں۔اس پروجیکٹ کی تخلیقی ہدایت کاری پاکستان کے ابھرتے ہوئے ہنرمند عمر رشید نے کی ہے، جنہوں نے ویڈیو میں ایک نیا، جاندار اور رنگین وژن شامل کیا۔”یا مصطفیٰ“ میں اعجاز گوشی کی روح میں اتر جانے والی آواز اور شیراز اپل کی جادوئی کمپوزیشن سامعین کو ایک اعلیٰ روحانی کیفیت میں لے جاتی ہے۔ اس قوالی کی ویڈیو بھی بے حد دلکش ہے، جس میں شاندار سیٹ، عمدہ آرٹ ڈائریکشن اور خوبصورت مناظر شامل ہیں، جو عقیدت اور محبت کی خوبصورت تصویر پیش کرتے ہیں۔ویڈیو کی کہانی ایک ہم نوا قوال اور اس کے بیٹے پر مبنی ہے، جو دونوں نبی کریم کے عاشق اور پیروکار ہیں۔ بچہ لاہور کی گلیوں میں گھومتے ہوئے روضہ رسول کا ایک خوبصورت ماڈل تلاش کرتا ہے۔ دن بھر کی تلاش اور گھومنے پھرنے کے بعد، وہ یہ قیمتی تحفہ اپنے والد تک پہنچاتا ہے، جو پس منظر میں قوالی کی محفل میں مشغول ہوتا ہے۔ یہ منظر ایک عظیم روحانی محبت اور عقیدت کی علامت بن کر سامنے آتا ہے۔یہ اشتراک صرف موسیقی کا سنگم نہیں، بلکہ فن، عقیدت اور روحانی جذبات کا حسین امتزاج ہے، جہاں اعجاز گوشی کی دل میں اتر جانے والی آواز اور شیراز اپپل کی شاندار موسیقی مل کر ایک لازوال فن پارہ تخلیق کرتے ہیں۔

۔۔۔۔۔۔۔۔۔۔۔۔۔۔