پاک بحریہ کے سربراہ ایڈمرل ظفر محمود عباسی نے ملائیشیا کا دورہ کیا، جہاں ان کا پرتپاک استقبال کیا گیا۔ترجمان پاک بحریہ کے مطابق پاک بحریہ کے سربراہ ایڈمرل ظفر محمود عباسی نے ملائیشیا کا دورہ کیا، منسٹری آف ڈیفنس ملائیشیا آمد پر ملائیشیا کے نیول چیف نے پاک بحریہ کے سربراہ کا پرتپاک استقبال کیا، انہیں اعزازی گارڈ نے سلامی بھی پیش کی۔ امیر البحر نے ملائیشین نیول چیف اور ڈیفنس منسٹر سے الگ الگ ملاقاتیں کیں، اس دوران باہمی دلچسپی کے امور اور دو طرفہ بحری تعاون پر تبادلہ خیال کیا گیا۔ترجمان پاک بحریہ نے بتایا کہ ملاقاتوں میں سربراہان نے پاکستان نیوی اور ملائیشین نیوی کے مابین بحری مشقوں کے انعقاداور تربیتی پروگرامز کے تبادلوں پر زور دیا۔سربراہ پاک بحریہ نے ریجنل سکیورٹی کے ضمن میں پاک بحریہ کی کاوشوں خصوصا ریجنل میری ٹائم سکیورٹی پٹرول کے اقدام پر روشنی ڈالی۔ نیول چیف نے ملائیشین نیوی کی امن مشقوں میں شرکت کرنے پر ملائیشین نیول چیف اور ڈیفنس منسٹر کا شکریہ ادا کیا۔پاک بحریہ کے ترجمان کے مطابق ملائیشیا کے نیول چیف اور ڈیفنس منسٹر نے مشترکہ میری ٹائم سکیورٹی کی تشکیل کے سلسلے میں پاک بحریہ کی کاوشوں کی تعریف کی۔ترجمان کا کہنا ہے کہ نیول چیف کے دورے سے دونوں ممالک کی بحری افواج کے درمیان تعلقات کو مزید فروغ حاصل ہو گا۔