چیئرمین جوائنٹ چیفس آف سٹاف کمیٹی جنرل ساحر شمشاد مرزا نے نیشنل ایرو سپیس سائنس اینڈ ٹیکنالوجی پارک کا انتہائی اہم دورہ کیاہے ۔ چیئرمین جوائنٹ چیفس آف سٹاف کمیٹی کے دورے نے اس جدید منصوبے کی اہمیت اور ایرو اسپیس، سائبر اور کمپیوٹنگ کے شعبوں میں قومی منظر نامے میں انقلاب برپا کرنے کی اسکی صلاحیت کو اجاگر کیا۔ نیشنل ایرو سپیس سائنس اینڈ ٹیکنالوجی پارک آمد پر سربراہ پاک فضائیہ ائیر چیف مارشل ظہیر احمد بابر سدھو نے معزز مہمان کا پرتپاک استقبال کیا۔ اس موقع پر پرنسپل سٹاف آفیسرز سمیت اعلی سطح کے سول و عسکری حکام بھی موجود تھے۔ دورے کے دوران چیئرمین جوائنٹ چیفس آف سٹاف کمیٹی کو جدید ترین تنصیبات، تحقیق و ترویج کے لئے مختص مراکز اور نئی ابھرتی ہوئی ڈسرپٹو ٹیکنالوجیز کے لیے وقف اسکے جدید مراکز سے روشناس کروایا گیا۔ ائیر چیف نے معزز مہمان کو نیشنل ایرو سپیس سائنس اینڈ ٹیکنالوجی پارک کے جدید ترین ڈیزائن اور تحقیق و ترقی کے ماحول کے ذریعے دنیا کے اعلیٰ ترین ایرو سپیس، سائبر اور کمپیوٹنگ کلسٹرز میں سے ایک بننے کے اپنے وژن کے بارے میں آگاہی فراہم کی۔ اس موقع پر سربراہ پاک فضائیہ نے اس بات پر روشنی ڈالی کہ حکومت پاکستان کی سرپرستی اور تعاون کی بدولت نیشنل ایرو سپیس سائنس اینڈ ٹیکنالوجی پارک جامع منصوبہ بندی، مربوط کاوشوں اور باہمی تعاون کے ذریعے انتہائی قلیل وقت میں ترقی کے آسمان کو چھو رہا ہے۔ انہوں نے چیئرمین جوائنٹ چیفس آف سٹاف کمیٹی، جنرل ساحر شمشاد مرزا اور چیف آف آرمی سٹاف جنرل سید عاصم منیر کو انکے ہر ممکن تعاون اور اس منصوبے میں خصوصی دلچسپی لینے پر خراج تحسین پیش کیا جسکی بدولت نیشنل ایرو سپیس سائنس اینڈ ٹیکنالوجی پارک کے تصور کو حقیقی معنوں میں عملی جامہ پہنانا ممکن ہوا۔ چیئرمین جوائنٹ چیفس آف سٹاف کمیٹی نے نیشنل ایرو سپیس سائنس اینڈ ٹیکنالوجی پارک کو قومی و تزویراتی اہمیت کا حامل منصوبہ قرار دیا جس سے ملک کے لئے کثیر الجہتی فوائد کا حصول ممکن ہو گا۔ انہوں نے اس بات پر بھی زور دیا کہ نیشنل ایرو سپیس سائنس اینڈ ٹیکنالوجی پارک منصوبہ تکنیکی ترقی کو متحرک کرنے اور قومی خود انحصاری کو پروان چڑھانے میں معاون ثابت ہوگا۔ جنرل ساحر شمشاد مرزا نے ریکارڈ وقت میں اس اہم سنگ میل کو عبور کرنے پر پاک فضائیہ اور اس کے ہنرمند اہلکاروں کی کاوشوں کو سراہا۔ انہوں نے ایئر چیف کی متحرک قیادت کی بھی تعریف کی جن کے پختہ عزم اور انتھک کاوشوں سے اس منصوبے کو برق رفتاری سے مکمل کرنے کی راہ ہموار ہوئی۔نیشنل ایرو اسپیس سائنس اینڈ ٹکنالوجی پارک منصوبہ تکنیکی ترقی کے حصول کی خاطر تعلیم و تربیت، صنعت اور مسلح افواج کے باہمی تعاون میں ایک مرکز کے طور پر کام کرے گا۔ پاک فضائیہ کی صلاحیتوں اور موجودہ وسائل کو بروئے کار لاتے ہوئے اس منصوبے کے ذریعے جدت کا حصول، ٹیلنٹ کو پروان چڑھانے اور ملکی سطح پر ایروسپیس سے متعلقہ صلاحیتوں میں ترقی کے لئے سہولیات کی فراہی ممکن بنائی جا سکے گی۔ چیئرمین جوائنٹ چیفس آف سٹاف کمیٹی کا نیشنل ایرو سپیس سائنس اینڈ ٹیکنالوجی پارک کا دورہ پاکستان کی ایرو سپیس، سائبر اور کمپیوٹنگ ڈومینز میں اعلیٰ کارکردگی کے حصول کے حوالے سے ایک اہم سنگ میل ہے۔ یہ منصوبہ جدید ٹیکنالوجیز کو بروئے کار لانے، تحقیق اور ترقی کو فروغ دینے اور تکنیکی جدت میں کلیدی کردار ادا کرنے کے پاکستان کے عزم کا منہ بولتا ثبوت ہے۔

چین سے آئے جیانگ سو پولیس افسران کے وفد نے پنجاب سیف سٹیز اتھارٹی کا دوہ کیا