پابندی کے باوجود دکانیں کھولنے کی شکایتوں پر کمشنر کراچی نے ایس او پیز کی خلاف ورزی کرنے والی مارکیٹوں کو وارننگ دے دی اور کہا پابندی والے دکاندار دکانیں نہ کھولیں ورنہ سخت کارروائی ہوگی۔تفصیلات کے مطابق کمشنر کراچی نے کاروبار پر پابندی کی خلاف ورزی کر نے کا نوٹس لے لیا اور تنبیہ نوٹس جاری کرتے ہوئے کہا کہ تاجر ایس او پیز پر عملدرآمد کی ذمہ داری پوری کریں ، پابندی والے دکاندار دکانیں نہ کھولیں ورنہ سخت کارروائی ہوگی، اس حوالے سے ڈپٹی کمشنرز ایس او پیز پر سختی سے عملدرآمد کرائیں۔کمشنر کراچی نے تمام اضلاع کے ڈی سیز کو ہدایت جاری کر دی ہے ، جس میں کہا گیا ہے کہ جس کاروبار پر حکومت نے پابندی عائد کی ہے وہ خلاف ورزی نہ کریں۔کمشنر کراچی کے اعلامیہ کے مطابق حکومت کے احکامات کے مطابق جس کاروبار اور سرگرمی کی اجاز ت نہیں ، ان میں تعلیمی اور تربیتی انسٹی ٹیوٹس، میرج ہالز، بزنس سینٹرز، ایکسپو ہالز، تمام انڈور اسپورٹس کلبس، انڈور جمزاور اسپورٹس فیسی لیٹیز، اور کانٹیکٹ اسپورٹس، انڈور اور آوٹ ڈور کھیلوں کے ٹورنامنٹس شامل ہیں۔اعلامیے کے مطابق ریسٹورنٹس، کیفے کھولنے کی اجازت نہیں ( تاہم ٹیک اوے اور ہوم ڈیلیوری کی اجاز ت ہے ، ) جبکہ ہر قسم کے تفریحی پارکس اور تفریح کے مراکز، بیوٹی پارلرز ،سنیما تھیٹر ہر نوعیت کے عام اجتماعات اور ٹورزم اور ٹورسٹ ہوٹلز پر بھی پابندی ہے۔