:وزیراعظم عمران خان کا کہنا ہے کہ موجودہ معاشی حالات اس امر کے متقاضی ہیں کہ اصلاحات کے عمل کی رفتار کو تیز کیا جائے، عوام پر غیرضروری بوجھ کو کم سے کم کر کے ریلیف فراہم کیا جائے۔ وزیر اعظم عمران خان کی زیر صدارت بجٹ برائے مالی سال 21-2020 کے حوالے سے اعلیٰ سطح کا اجلاس منعقد ہوا،اس دوران معاشی ٹیم نے وزیر اعظم کو آئندہ مالی سال کے بجٹ کے محصولات، اخراجات اور ترجیحات کے حوالے سے حکمت عملی پر بریفنگ دی ۔اس موقع پر وزیراعظم کا کہنا تھا کہ کورونا وباکی وجہ سے ہر طبقہ متاثر ہوا ہے اور معیشت کو استحکام دینے اور ترقی کی راہ پر گامزن کرنے کی کوششیں متاثر ہوئی ہیں، ان شعبوں کو خصوصی طور پر فروغ دیا جائے جن سے نوجوانوں کے لئے نوکریوں کے مواقع اور معاشی عمل کو فروغ ملتا ہے۔ وزیراعظم کا کہنا تھا کہ غیر ضروری حکومتی اخراجات میں کٹوتی موجودہ حکومت کی روز اول سے ترجیح رہی ہے، موجودہ صورتحال کے تناظر میں اس مقصد کو آگے بڑھانے پر خصوصی توجہ وقت کی اہم ضرورت ہے، سبسڈی عوام کے ٹیکسوں کا پیسہ ہے، اس پیسے کے بہترین اور موثر استعمال کو یقینی بنایا جائے ، حقداروں تک ان کے حق کو پہنچانے کے عمل کو بھی یقینی بنایا جا سکے، موجودہ معاشی حالات اس امر کے متقاضی ہیں کہ اصلاحات کے عمل کی رفتار کو تیز کیا جائے ، عوام پر پڑنے والے غیرضروری بوجھ کو کم سے کم کر کے ریلیف فراہم کیا جائے۔