اسلام آباد ہائی کورٹ نے توشہ خانہ کیس میں عمران خان کی الیکشن کمیشن کی جانب سے نااہلی کے فیصلے کے خلاف درخواست پرمیانوالی کی نشست پر ضمنی الیکشن روکنے کے حکم میں 11 مئی تک توسیع کردی۔توشہ خانہ کیس میں عمران خان کی الیکشن کمیشن کی جانب سے نااہلی کے فیصلے کے خلاف درخواست کی سماعت اسلام آباد ہائی کورٹ میں ہوئی ۔ عمران خان کے وکیل بیرسٹر علی ظفر عدالت میں پیش ہوئے۔ سماعت کے آغاز پر عدالت نے ریمارکس دئیے کہ ویسے یہ ایک سیکنڈ کا کیس ہے، لیکن پتا نہیں کیوں اس میں دیر ہو رہی ہے ۔ وکیل نے کہا اصل ایشو یہ ہے کہ درخواست واپس لینے کی متفرق درخواست ہے۔ لاہور ہائی کورٹ میں کیس فل بنچ کے سامنے زیر سماعت ہے۔ چیف جسٹس نے ریمارکس دئیے کہ لاہور ہائی کورٹ میں آپ کا کیس کب لگا ہوا ہے، جس پر وکیل نے جواب دیا کہ ہمارا کیس لاہور میں 19 مئی کو شاید مقرر ہے ۔ مسلسل کیسز لگے ہوئے ہیں، میں نے چھٹی پر بھی جانا ہے۔ چیف جسٹس نے کہا الیکشن کمیشن کی طرف سے التوا کی درخواست آئی ہے۔توشہ خانہ کیس میں نا اہلی کے فیصلے کو عمران خان نے لاہور ہائیکورٹ میں بھی چیلنج کر رکھا ہے۔ عمران خان نے اسلام آباد ہائی کورٹ میں ایسی ہی دائر درخواست واپس لینے کے لیے رجوع کر رکھا ہے ۔ بعد ازاں عدالت نے الیکشن کمیشن کے وکیل خالد اسحاق کی جانب سے التوا کی درخواست منظور کرتے ہوئے کیس کی مزید سماعت جمعرات 11 مئی تک ملتوی کردی۔

جولائی تا ستمبر: برآمدات میں 3.78، درآمدات میں 25.36 فیصد کمی ریکارڈ