پی پی 39 ، کامیاب آزاد امیدوار رانا لیاقت کا ن لیگ میں شمولیت کا اعلان

Aug 06, 2018 | 15:47

پنجاب اسمبلی کے حلقے پی پی 39 سے کامیاب ہونے والے آزاد امیدوار رانا لیاقت نے مسلم لیگ (ن) میں شمولیت کا اعلان کردیا۔رانا لیاقت نے صدر مسلم لیگ(ن)شہباز شریف سے ملاقات کی اور پارٹی میں شامل ہونے کا اعلان کیا۔اس موقع پر رانا لیاقت نے مسلم لیگ (ن) کی قیادت پر بھرپور اعتماد کا اظہار کیا۔ملاقات میں سابق وفاقی وزیر خواجہ آصف بھی موجود تھے۔واضح رہے کہ حالیہ عام انتخابات کے بعد پاکستان تحریک انصاف واضح برتری کے ساتھ ایک مضبوط جماعت بن کر سامنے آئی ہے، جو مسلم لیگ(ن) کے گڑھ پنجاب میں بھی حکومت بنانے کی خواہشمند ہے۔ایسے میں دونوں جماعتوں کی جانب سے آزاد امیدواروں کی کھینچا تانی بھی جاری ہے، جو نمبر گیم پوری کرنے میں اہم کردار ادا کریں گے۔گذشتہ دنوں پاکستان مسلم لیگ (ن)کے رہنما رانا ثنا اللہ نے دعویٰ کیا تھا کہ 13 نو منتخب آزاد ارکان صوبائی اسمبلی ان کے ساتھ ہیں اور پنجاب میں حکومت مسلم لیگ(ن) ہی بنائے گی۔انہوں نے کہا کہ '130 نشستیں ہم جیتے ہوئے ہیں اور حکومت بنانے کے لیے 18 اراکین کی ضرورت ہے جب کہ پیپلزپارٹی کے 6 اور 13 آزاد ارکان کے ملنے سے ہماری حکومت پنجاب میں بن جاتی ہے ۔دوسری جانب پی ٹی آئی کی جانب سے بھی مطلوبہ تعداد پوری ہونے کا دعویٰ کیا جارہا ہے۔

مزیدخبریں