پشاورپولیس نے بہن اور بھائی کو بیدردی کے ساتھ قتل کرنے والے ملزم کو گرفتار کر لیا
پشاور پولیس نے 2 روز قبل تھانہ متھرا کی حدود میں افطاری کے وقت بہن اور بھائی کو بیدردی کے ساتھ قتل کرنے والے ملزم کو گرفتار کر لیا۔تفصیلات کے مطابق امداد ولد مصلی خان ساکن صادق آباد نے تھانہ متھرا پولیس کو رپورٹ کی تھی کہ اس کے بیٹے محمد اسحاق نے افطاری کے وقت اپنی بہن اور بھائی کو بے دردی سے قتل کیا ہے جس پر مقدمہ درج کر کے تفتیش شروع کر دی گئی۔ایس ایس پی آپریشن ظہور بابر آفریدی نے واقعہ کا سختی سے نوٹس لیتے ہوئے ایس پی رورل نجم الحسنین کی سربراہی میں ڈی ایس پی رورل رحیم حسین اور ایس ایچ او متھرا حسن خان پر مشتمل ٹیم تشکیل دے کر ملزم کو جلد از جلد گرفتار کرنے کا ٹاسک حوالے کیاجنہوں نے ملزم کے تمام ممکنہ ٹھکانوں پر کارروائیوں کا سلسلہ شروع کیا جبکہ گزشہ روز مصدقہ خفیہ اطلاع ملنے پر کارروائی کے دوران ملزم محمد اسحاق ولد امداد کو ضلع نوشہرہ کے ایک بھٹہ خشت سے گرفتار کر لیا ۔ ملزم نے ابتدائی تفتیش کے دوران اپنے جرم کا اعتراف کر لیا ہے جس کی نشاندہی پر آلہ قتل بھی برآمد کر لی گئی ملزم سے مزید تفتیش جاری ہے۔
