کرونا سے نہ ڈرنے والوں کو اجتماعی قبروں کا خوف دلا کر گھروں میں رکھنے کی کوشش
دنیا بھرمیں پھیلنے والے کرونا وائرس کے باعث لوگوں کو گھروں کی کوشش کی جا رہی ہے مگر مسلسل لاک ڈائون سےتنگ لوگ سڑکوں پر نکل جاتے ہیں۔ یوکرین میں حکام نے لوگوں کو گھروں میں رکھنے کا ایک انوکھا طریقہ اختیار کیا ہے۔
خبر رساں اداروں کے مطابق یوکرین کے مصروف ترین سمجھے جانے والے شہر ڈنیبرو میں لوگوں کو گھروں میں رکھنے کی ترغیب دلانے کے لیے اجتماعی قبریں کھودی جا رہی ہیں تاکہ لوگوں کو ان قبروں کا خوف دلا کرانہیں گھروں میں قید کیا جا سکے۔
ڈنیبرو کے میئر نے بتایا کہ شہر کے قبرستانوں میں 615 اجتماعی قبریں کھودی گئی ہیں اور دو ہزار تابوت تیار کیے گئے ہیں۔ ڈنیبرو میں کرونا کے متعدد کیس سامنے آئے ہیں مگر ابھی تک کوئی جانی نقصان نہیں ہوا ہے۔
اس اقدام کی شروعات میئر بورس فلاٹوف نے کی ہے۔ وہ ایک امیر کھلے ذہن اور سوشل میڈیا پلیٹ فارمز پر بہت متحرک کاروباری شخصیت ہیں۔ اُنہوں نے 2 اپریل کو اپنے فیس بک پیج پر اجتماعی قبروں کی تصاویر پوسٹ کرنے کے ساتھ لکھا کہ یہ ان لوگوں کے لیے تیاری ہے جنھیں ابھی تک ادراک نہیں کہ انہیں اپنی اور دوسروں کی جان بچانی ہے۔ہم ان کے لیے بدترین کی تیاری کر رہے ہیں۔