روشن مثال قائم کرنی ہے تو عمران صاحب استعفیٰ دیں، احتساب کے کٹہرے میں کھڑے ہوں،مریم اورنگزیب

پاکستان مسلم لیگ (ن)کی ترجمان مریم اورنگزیب نے کہا ہے کہ خود احتسابی اسے کہتے ہیں کہ میاں محمد نوازشریف،میاںمحمد شہبازشریف اور مسلم لیگ( ن) نے جھوٹے الزامات کے باوجود خود کو قانون کے حوالے کیا۔مسلم لیگ( ن) نے کال کوٹھری اور سزائے موت کی چکیوں میں رہ کر جھوٹے الزامات کا جواب دیا ہے ، خود احتسابی یہ ہوتی ہے۔اپنی بجائے اپنے اے ٹی ایم ،کچن چلانے اور دھرنا سجانے والے کو قانون کے حوالے کرنے سے خود احتسابی نہیں خود غرضی کہتے ہیں۔عمران صاحب خود احتسابی کی بات تب کریں جب خود کو اور بزدار صاحب کو قانون کے حوالے کردیں۔روشن مثال قائم کرنی ہے تو عمران صاحب استعفیٰ دیں، احتساب کے کٹہرے میں کھڑے ہوں۔ان خیالات کا اظہار مریم اورنگزیب نے بدھ کے روز ٹوئٹر پر جاری اپنے بیان میں کیا۔ ا نہوں نے کہا کہ آٹے چینی چوری کے سب فیصلوں پر عمران اور بزدار صاحب کے دستخط ہیں ۔عمران اور بزدار صاحب بھی گرفتار ہوں ، سزائے موت کی چکیوں میں رہ کر آٹا اور چینی کے اپنے فیصلوں کا جواب دے دیں۔عمران صاحب نے اپنے عمل سے ثابت کیا کے وہ قانون سے بالاتر ہیں۔جب شوگر مل والے گھر بنا کر دیں ، گاڑی خرید کر دیں تو شوگر مل لگانے کی کیا ضرورت ہے۔جب شوگر مل والے کچن ، پارٹی اور دھرنے کا خرچہ چلائیں تو اپنی شوگر مل لگانے کی کیا ضرورت؟ عمران صاحب کی تاریخ ان کے ہاتھ دوسروں کی جیب میں سے بھری پڑی ہے۔مقصد عوام کے مفاد کا تحفظ ہوتا تو آٹے اور چینی کی قلت ہوتے ہوئے عمران صاحب چینی اور آٹے کی برآمد کے فیصلے پہ دستخط نہ کرتے۔مقصد عوام کے مفاد کا تحفظ ہوتا تو عوام کو مہنگا آٹا اور چینی فروخت کرنے کے فیصلے پہ دستخط نہ کرتے کی۔