محکمہ خوراک سندھ نے ٹھٹھہ اور بدین میں نجی شعبے کی گندم خریداری پر عائد پابندی ختم کر دی جبکہ بھاری رشوت طلب کرنے پر مٹیاری، جامشورو اور حیدر آباد کے چیک پوائنٹس ختم کرنے کے احکامات جاری کیے ہیں۔محکمہ خوراک سندھ کی جانب سے ڈسٹرکٹ کنٹرولر ٹھٹھہ اور بدین کو خط کے ذریعے مطلع کیا گیا کہ 2 ضلعوں میں نجی شعبے کی گندم خریداری پر 22 اپریل سے عائد پابندی کو ختم کیا جا رہا ہے۔ محکمہ خوراک سندھ کی جانب سے ڈپٹی ڈائریکٹر فوڈ ڈیپارٹمنٹ کراچی، حیدر آباد، میر پور خاص اور شہید بے نظیر آباد کو لکھے گئے ایک اور خط کے ذریعے مٹیاری، جامشورو، حیدرآباد اور شہید بے نظیر آباد میں ڈسٹرکٹ فوڈ کنٹرولر کے قائم کردہ چیک پوائنٹس ختم کردیئے گئے ۔محکمہ خوراک سندھ کے مطابق چیئرمین فلور ملز ایسوسی ایشن نے ان چیک پوائنٹس پر کراچی کو گندم فراہم کرنے والے ٹرالر اور ٹرکس سے بھاری رشوت طلب کرنے کی شکایت کی تھی۔ محکمہ خوراک نے کہا کہ کراچی کو گندم کی ترسیل میں رکاوٹوں کے سبب گندم کی قیمت میں تیزی سے اضافہ ہوا ہے اور خدشات ہیں کہ صورتِ حال کی وجہ سے آٹے کی قیمت بھی بڑھے گی۔محکمہ خوراک سندھ کا یہ بھی کہنا ہے کہ کراچی کو گندم کی ترسیل نہ روکنے کے واضح احکامات جاری کیے گئے تھے جن پر عمل درآمد نہیں ہو رہا تھا۔

سونے کی عالمی قیمت میں اضافہ مقامی قیمتوں میں کمی