اسلام آباد پولیس نے پنجاب میں پی ٹی آئی مظاہرین کیخلاف کارروائی کی اجازت مانگ لی
وفاقی پولیس نے سیکرٹری داخلہ اور چیف کمشنر کو خط لکھ کر اسلام آباد ائیرپورٹ کو جانے والے ایم ون اور ایم ٹو کو کلئیر کرنے کی اجازت طلب کرلی۔
وفاقی پولیس نے سیکریٹری داخلہ اور چیف کمشنر کو خط لکھا ہے جس میں کہا گیا ہے کہ ائیر پورٹ کا شمار اہم تنصیبات میں ہوتا ہے، ائیرپورٹ جانے اور آنے والے راستے انتہائی اہمیت کے حامل ہیں، آئین کے آرٹیکل 97/149اور 151ائیرپورٹ اور اس کے راستوں کو تحفظ دیتے ہیں۔
اسلام آباد پولیس کی جانب سے لکھے گئے خط میں کہا گیا ہے کہ اسلام آباد ائیر پورٹ اور راستے انتظامی طور پر پنجاب کی حدود میں ہیں، وفاقی دارلحکومت تک رسائی کے لئے قانون نافذ کرنے والے ادارے، سفارت کار اور غیرملکی شخصیات یہی راستہ استعمال کرتے ہیں۔
