ملک بھر میں سونے کی قیمتوں میں مسلسل اضافے کے بعد آج معمولی کمی ریکارڈ کی گئی

کراچی : پاکستان میں سونے کی قیمت میں کمی دیکھنے میں آئی ہے، جس سے زیورات کے خریداروں اور سرمایہ کاروں کو کچھ ریلیف ملا ہے۔ تفصیلات کے مطابق ملک بھر میں سونے کی قیمتوں میں مسلسل اضافے کے بعد آج معمولی کمی ریکارڈ کی گئی۔ آل پاکستان جیمز اینڈ جیولرز ایسوسی ایشن کی جانب سے بتایا گیا فی تولہ سونا 300 روپے سستا ہو کر 3 لاکھ 62 ہزار 400 روپے کا ہوگیا۔ اسی طرح 10 گرام سونے کی قیمت 257 روپے کمی کے بعد 3 لاکھ 10 ہزار 699 روپے ہوگئی۔ دوسری جانب عالمی مارکیٹ میں بھی سونے کی قیمت 3 ڈالر کمی سے 3 ہزار 397 ڈالر فی اونس ریکارڈ کی گئی۔ واضح رہے کہ سونا خریدنا روایتی طور پر محفوظ سرمایہ کاری سمجھا جاتا ہے جس کی قیمت افراط زر، سیاسی اور معاشی عدم استحکام کے اوقات میں بڑھ جاتی ہے۔ اسے صدیوں سے کرنسی اور دولت کی شکل کے طور پر استعمال کیا جاتا رہا ہے، جب سرمایہ کار دوسرے اثاثوں کے بارے میں غیر یقینی محسوس کرتے ہیں، تو وہ اکثر سونا خریدے ہیں۔ پاکستان میں گزشتہ برس سونے کی قیمت کے تعین کے طریقہ کار میں تبدیلی کی گئی تھی، جس کے تحت سونے کی قیمت انٹرنیشنل مارکیٹ ریٹ سے 20 ڈالر فی اونس زیادہ مقرر کی گئی۔