انجیلا مرکل کے اقتدار کا خاتمہ، اولاف شولز نے جرمنی کے نویں چانسلر منتخب
برلن: سوشل ڈیموکریٹ جرمن رہنما اولاف شولز نے جرمنی کے نویں چانسلر کے طور پر حلف اٹھالیا ہے۔ چانسلر اولاف شولز کے زمام حکومت سنبھالتے ہی انجیلا مرکل کے 16 سالہ اقتدار کا خاتمہ ہو گیا۔ ایوان چانسلر کے مطابق جرمنی کے نئے چانسلر پہلے سرکاری دورے پر جمعہ کو پیرس اور برسلز جائیں گے جہاں وہ فرانسیسی صدر ایمانوئیل میکروں اور یورپین کمیشن کی سربراہ سے ملاقاتیں کریں گے۔ اس سے قبل جرمن پارلیمنٹ نے اولاف شولز کو جرمن چانسلر منتخب کیا۔ سوشل ڈیموکریٹک پارٹی کے اولاف شولز نے 707 ووٹوں میں سے 395 ووٹ حاصل کیے۔ ان کے انتخاب پر یورپین کمیشن کی سربراہ نے اولاف شولز کیساتھ کام کرنے کے عزم کا اظہار کیا۔