ڈی جی حج عبدالوہاب سومرو کا مدینہ منورہ میں پاکستانی عازمین حج کے ہوٹلوں کا دورہ اور ملاقات

نمائندہ (نوائے وقت مدینہ منورہ) جاوید اقبال بٹ: ڈی جی حج عبدالوہاب سومرو کا مدینہ منورہ میں پاکستانی عازمین حج کے ہوٹلوں کا دورہ، ڈائننگ ہالز میں عازم کرام سے کھانے سمیت دیگر سہولیات بارے استفسار کیا۔ اس موقع پر عازمین حج نے کھانے، رہائش گاہوں اور عملے کی مستعدی کی تعریف کی۔ انہوں نے عازمین حج کو بتایا کہ ایام حج میں پاکستانی عازمین حج کے لیے مثالی اقدام کیے ہیں۔ پہلی بار اے سی والے خیمے، صوفہ کم میٹرس، چپسم بورڈ کی پارٹیشن، سامان کے لیے ریک، سایہ دار راہداریاں اور مصنوعی گھاس لگائی گئی ہے۔ سہولیات کے اعتبار سے سرکاری سکیم 25 لاکھ والے حج کے برابر ہے۔ عازمین حج پر یہ کوئی احسان نہیں بلکہ حکومت نے انہیں یہ ذمہ داری سونپی ہے کہ حج انتظامات بہترین ہوں۔ عازمین حج کا قیام سہولیات اور روحانی اعتبار سے مثالی ہو گا۔ انہوں نے پاکستانی عازمین کرام سے اپیل کی کے ملک پاکستان کی سلامتی و ترقی کے لیے خصوصی دعائیں کریں۔ بعد ازاں ڈی جی حج ہوٹل انتظامیہ اور کیٹرنگ سروس کے نمائندوں  سے بھی ملے اور ان کی کارکردگی پر اطمینان کا اظہار کیا۔