جنوبی افریقہ نے آسٹریلیا کے خلاف پہلے ٹیسٹ کے پہلے روز دو وکٹوں کے نقصان پر دوسو پچپن رنز بنالئے۔
آسٹریلیا کے شہر برسبین میں کھیلے جارہے پہلے ٹیسٹ میچ کے پہلے روز جنوبی افریقہ نے آسٹریلیا کے خلاف ٹاس جیت کر پہلے بیٹنگ کا فیصلہ کیا۔ پروٹیز کی پہلی وکٹ کپتان گرائم سمتھ کی گری جو صرف دس رنز بنا کر آسٹریلوی باؤلر جیمز پیٹیسن کا شکار ہوگئے۔ جنوبی افریقہ کی دوسری وکٹ الویرو پیٹرسن کی ایک سو انیس کے مجموعی سکور پر گری، انہیں نیتھن لیون نے پیویلین بھیجا۔ تاہم اس کے بعد ہاشم آملہ اور جیک کیلس نے اپنی بیٹنگ کو سہارا دیا، اس وقت کریز پر ہاشم آملہ نوے اور جیک کیلس اسی کے انفرادی سکور پر موجود ہیں۔ جبکہ پہلے روز کے اختتام پر مہمان ٹیم نے دو وکٹوں کے نقصان پر دوسوپچپن رنز بنالئے ہیں۔
