مسلم لیگ (ن) کی نائب صدر مریم نواز نے کہاہے کہ ابھی تک ہم نے اپنے اراکین کو استعفے دینے کا نہیں کہا لیکن میرے پاس استعفوں کے انبار لگے ہوئے ہیں،یہ حکومت جلد ہی انجام کو پہنچے گی۔لاہور میں ریلی کے ساتھ روانگی سے قبل میڈیا سے بات کرتے ہوئے مسلم لیگ ن کی نائب صدر مریم نواز کا کہنا تھا کہ میں خود لاہور کے شہریوں کو دعوت دینے نکلی ہوں کہ پی ڈی ایم کا ساتھ دیں، لاہور کے شہریوں سے کہنے جارہی ہوں کہ  فیصلے کا وقت آ گیا ہے کہ اس جابر، نااہل اور نالائق حکومت سے جان چھڑوائی جائے۔مریم نواز کا کہنا تھا کہ یہ حکومت اب نہیں چل سکتی، اللہ یہ وقت کسی کو نہ دکھائے کہ  ڈھائی سال تک این آر او نہ دینے کی باتیں کرنے والے عمران خان  خود ہاتھ جوڑ کر پی ڈی ایم سے  این آر او مانگ رہے ہیں۔لیگی رہنما نے کہا کہ گزشتہ روز ڈی جے بٹ کی گرفتاری سے واضح ہے کہ عمران خان نے ہمیشہ اپنے ہی لوگوں سے دغا کیا ہے، ہمیں علم نہیں تھا کہ آپ کا مقابلہ پی ڈی ایم کی بجائے کرسیاں اور ٹینٹ والوں سے ہے، ہم ڈی جے بٹ کی گرفتاری کی مذمت کرتے ہیں، اس سے ظاہر ہے کہ پی ڈی ایم کامیاب ہو گئی ہے۔مریم نواز نے مزید بتایا کہ ابھی تک ہم نے اپنے اراکین کو استعفے دینے کا نہیں کہا لیکن میرے پاس استعفوں کے انبار لگے ہوئے ہیں، مسلم لیگ(ن)نے ہمیشہ اس ملک کی خدمت کی ہے اور آئندہ بھی کرے گی اور مستقبل ان شا اللہ مسلم لیگ(ن)کا ہے،مریم نواز کامزید کہنا تھا کہ نواز شریف نے کہہ دیا تھا انکا مقابلہ بچوں اور سیاسی بونوں سے نہیں،یہ حکومت جلد ہی انجام کو پہنچے گی۔مریم نواز کی ریلی سے قبل بڑی تعداد میں مسلم لیگ نون کے کارکنان جاتی امرا پہنچے، ریلی سے قبل گھوڑوں کا رقص پیش کیا گیا، جبکہ ریلی کے خیر مقدم کیلئے شہر کے مختلف علاقوں میں کیمپ لگائے گئے ہیں۔

ضابطہ اخلاق کی خلاف ورزی: ڈپٹی اسپیکر قاسم سوری پر جرمانہ