ترجمان دفتر خارجہ زاہد حفیظ نے کہا ہے کہ یورپی یونین ڈس انفو لیب نے ایک بار پھر پاکستان کے خلاف بھارتی منفی پروپیگنڈے اور سائبر وار کا پول کھول دیا ہے۔بھارت خطے میں عدم استحکام کی بجائے اپنے مسائل پر توجہ دے، جمعرات کو ہفتہ وار میڈیا بریفنگ دیتے ہوئے ترجمان دفتر خارجہ نے کہا کہ ای یو ڈس انفو لیب کی حالیہ رپورٹ میں تمام حقائق بیان کردئیے گئے ہیں۔رپورٹ کے مطابق بھارت جعلی خبروں سے پروپیگنڈا کرتا تھا، پندرہ برس سے بھارت پاکستان مخالف پروپیگنڈا کرتا چلا آرہا ہے، نیٹ ورک کو سری واستو گروپ اور اے این آئی نیوز ایجنسی ملکرچلا رہے تھے، پرو پیگنڈے میں فوت شدہ شخصیات کے ناموں کو بھارتی نیٹ ورک استعمال کررہا تھا، اس کے علاوہ بھارت بہت سی جعلی این جی اوز کے نام بھی استعمال کررہاتھا، ان اوچھے ہتھکنڈوں کے باوجود بھارت پاکستان کے نام اور ساکھ کو متاثر کرنے میں ناکام رہا۔ترجمان دفترخارجہ نے کہا کہ بھارت کے پاکستان مخالف فیک نیوز، جعلی میڈیا سائٹس کا معاملہ انتہائی سنجیدہ ہے، ایک ریاست انٹرنیٹ اور میڈیا کو ایک ملک کےخلاف استعمال کر رہی ہے، ہم اس حوالے سے معاملے کو تمام ممکنہ پلیٹ فارمز پر اٹھائیں گے، بھارت خطے میں عدم استحکام کی بجائے اپنے مسائل پر توجہ دے۔زاہد حفیظ کا کہنا تھا کہ بھارت فالس فلیگ آپریشن کی تیاری میں مصروف ہے، ہماری مسلح افواج کسی بھی بھارتی مہم جوئی کامنہ توڑ جواب کے لیے تیار ہیں، ہماری افواج ہمہ وقت چوکنا ہیں۔ترجمان دفتر خارجہ نے کہا کہ بھارت کے شادی ایکٹ سے مسلم نوجوانوں کو نشانہ بنانےکی مذمت کرتے ہیں، بھارت کے سکھوں سے سلوک اور مسلم مخالف قانون سازی کو دنیا دیکھ رہی ہے، بھارت اقلیتوں پر مظالم کے ذریعہ خطے کے امن کی کوئی خدمت نہیں کر رہا ہے، عالمی سطح پر بھارت کی ساکھ صفر ہو چکی ہے،مقبوضہ کشمیر 493 روز سے بھارتی مظالم اور فوجی محاصرے میں ہے، گزشتہ روز پلوامہ میں تین نہتے کشمیریوں کو شہید کر دیا گیا ہے۔ترجمان دفتر خارجہ زاہد حفیظ نے بتایا کہ روسی فیڈریشن نے اسپتنک فائیو اینٹی کوویڈ ویکسین کی پیشکش کی ہے، روسی فیڈریشن کی پیشکش کو وزارت قومی صحت کو بھجوایاہے، حکومت کی کوشش ہے کوویڈ 19 ویکسین مناسب نرخ پرجلد دستیاب ہو،ترجمان دفترخارجہ کا کہنا تھا کہ چین اور پاکستان خطے میں امن و استحکام خواہاں ہیں، چین کے وزیر دفاع نے حال ہی میں پاکستان کا دورہ کیا، دونوں ممالک خطے میں امن و استحکام کے فروغ کے خواہشمند ہیں۔ترجمان دفترخارجہ نے امریکا کی جانب سے مذہبی آزادی کیخلاف ممالک میں پاکستان کو شامل کرنے کومسترد کرتے ہوئے کہا کہ پاکستان ان ممالک کی فہرست کومخصوص قرار دیتا ہے، اس حوالے سے باقاعدہ طور پر معاملے کو امریکی انتظامیہ سے اٹھایا ہے۔

ضابطہ اخلاق کی خلاف ورزی: ڈپٹی اسپیکر قاسم سوری پر جرمانہ