مولانا فضل الرحمان کے زیر صدارت پی ڈی ایم کا ورچوئل اجلاس 15نومبر کو ہوگا
اپوزیشن اتحاد پی ڈی ایم کے ترجمان حافظ حمد اللہ نے کہا ہے کہ پی ڈی ایم کا ورچوئل اجلاس 15 نومبر کو سہ پہر 3 بجے ہوگا۔ایک بیان میں حافظ حمد اللہ نے کہا کہ اجلاس کی صدارت پی ڈی ایم سربراہ مولانا فضل الرحمان کریں گے۔ترجمان کے مطابق اجلاس میں سابق وزیراعظم نواز شریف، قائد حزب اختلاف شہباز شریف، سردار اختر مینگل اور محمود اچکزئی ویڈیو لنک کے ذریعے شریک ہوں گے۔ اجلاس میں آفتاب شیرپاو، ڈاکٹر عبدالمالک، پروفیسر ساجد میر، شاہ اویس نورانی بھی وڈیو لنک سے شریک ہوں گے۔ترجمان نے کہا کہ پی ڈی ایم کے ورچوئل اجلاس میں حکومت مخالف مظاہروں پر مشاورت ہوگی اور آئندہ کی حکمت عملی کا فیصلہ ہوگا۔پی ڈی ایم ترجمان نے مزید کہا کہ الیکٹرانک ووٹنگ مشین (ای وی ایم)، انتخابی اصلاحات، نیب آرڈیننس اور دیگر امور پر بات ہوگی۔ان کا کہنا تھا کہ اجلاس میں اوورسیز پاکستانیوں کے مسائل بھی مشاورت کی جائے گی۔