پیپلز پارٹی اور (ن)لیگ نے نیب ختم نہیں کرنے دیا اب بھگتیں،نیب کے ذریعے سیاسی انتقام کا نشانہ بنایا جارہا ہے: مولانا فضل الرحمان
پشاور:جمعیت علما اسلام(ف)کے سربراہ مولانا فضل الرحمان نے کہا ہے کہ پیپلز پارٹی اور(ن)لیگ نے نیب ختم نہیں کرنے دیا اب بھگتیں۔نیب کے ذریعے سیاسی انتقام کا نشانہ بنایا جارہا ہے،پشاور میں منعقد تقریب سے خطاب کرتے ہوئے مولانا فضل الرحمان نے کہا کہ پرویز مشرف طرز پر نیب سیاسی انتقام لے رہا ہے، پیپلز پارٹی اور (ن) لیگ نے نیب ختم نہیں کرنے دیا اب بھگتیں جب کہ تحریک انصاف نے احتساب کمیشن ختم کیا ہے تو نیب کیوں نہیں ختم کرسکتے۔جے یو آئی(ف)کے سربراہ نے حکومت کی معاشی پالیسیوں کو تنقید کا نشانہ بناتے ہوئے کہا کہ قرصہ نہ لینے کی باتیں کرنے والوں نے روزانہ 15 ارب کے قرضے لئے، اب ہر شخص ڈیڑھ لاکھ روپے کا مقروض ہے، زرمبادلہ ذخائر نصف اور اسٹاک ایکسچینج کریش کر گئی، لاکھوں گھر گرا دیئے اور لاکھوں لوگ بے روزگار ہو گئے لیکن اب بھی آئی ایم ایف کی شرائط جاری ہیں۔مولانا فضل الرحمان نے کہا کہ پاکستان کی نظریاتی شناخت کو تبدیل کیا جارہا ہے، بین الاقوامی لابی معاملات پر ہمیں ڈکٹیٹ کرتی ہے، دوسروں کو انڈیا سے دوستی کے طعنے دیتے تھے اب خود کرتارپور کھول دیا اور فائدہ بھی نہ ہوا، کرتارپورقادیانیوں کے لیے کھولاگیاہے جب کہ آسیہ بی بی کی بریت عالمی اداروں نے مالی مدد سے مشروط کی اور فیصلے کے بعد قادیانیوں کا لندن میں اجتماع ہوا جس میں عمران خان سے وعدے ایفا کرنے کا کہا گیا۔سربراہ جے یو آئی کا مزید کہنا تھا کہ آئین مقدس صحیفہ تو ہے لیکن اس پرعمل نہیں ہو رہا، پاکستان تب ہی مضبوط ہو گا جب آئین پر عمل ہو گا، دھاندلی کے ذریعے بیرونی ایجنٹ مسلط کیے گئے جنہوں نے ان کومسلط کیا وہ ان سے شکوہ توکریں گے، کب تک دھاندلی ہوتی رہے گی اور اسٹیبلشمنٹ کردار ادا کرتی رہے گی۔