پاکستان اور بھارت کےدرمیان کرتارپورراہداری پراجلاس اتوارکوہوگا:ترجمان دفترخارجہ
پاکستان اور بھارت کے درمیان ایک اجلاس اتوار کو ہوگا جس میں کرتارپور راہداری کے طریقہ کار کو حتمی شکل دینے سے متعلق معاہدے کے مسودے پر غور کیا جائے گا۔ دفتر خارجہ کے ترجمان ڈاکٹر محمد فیصل نے آج اسلام آباد میں اپنی ہفتہ وار نیوز بریفنگ میں بتایا کہ بھارتی وفد بات چیت کیلئے پاکستان آئے گا جو واہگہ میں ہوگی۔ترجمان نے کہا کہ عالمی عدالت انصاف کلبھوشن یادیو کے مقدمے کا فیصلہ اس ماہ کی سترہ تاریخ کو سنائے گی۔ انہوں نے کہا کہ ہم فیصلے کے بارے میں کوئی قیاس آرائی نہیں کرسکتے تاہم پاکستان نے عالمی عدالت انصاف میں یہ مقدمہ بھرپور انداز میں لڑا ہے۔مقبوضہ کشمیر میں بھارتی مظالم کا حوالہ دیتے ہوئے دفترخارجہ کے ترجمان نے کہا کہ پاکستان نے انسانی حقوق کے بارے میں اقوام متحدہ کے ادارے کی دوسری رپورٹ کا خیرمقدم کیا ہے جس میں مقبوضہ کشمیر میں انسانی حقوق کی سنگین خلاف ورزیوں کا ایک بار پھر اعتراف کیا گیا ہے۔ انہوں نے کہا کہ ہم مقبوضہ علاقے میں حقائق جاننے کا مشن بھیجنے سے متعلق انسانی حقوق کے بارے میں اقوام متحدہ کے ادارے کے مطالبے کا بھی خیرمقدم کرتے ہیں۔