سائٹ ایریا کی ایک فیکٹری میں آگ لگ گئی، فائر بریگیڈ کی 8گاڑیاں آگ بجھانے میں مصروف ہیں، فائربریگیڈ عملے نے تیسرے درجے کی آگ قرار دے دیا۔تفصیلات کے مطابق کراچی کے علاقے سائٹ ایریا میں حبیب بینک چورنگی کے قریب فیکٹری میں لگنے والی آگ شدت اختیار کرگئی، آتشزدگی پر قابو پانے کیلئے فائر بریگیڈ کی آٹھ گاڑیاں موقع پر پہنچ گئیں لیکن آگ کی شدت پر قابو پانا مشکل ہوگیا جس کے بعد شہر بھر سے فائر بریگیڈ کی مزید گاڑیاں طلب کرلی گئیں۔فائربریگیڈ حکام کے مطابق سائٹ ایریا میں لگنے والی آگ تیسرے درجے کی ہے، آگ7منزلہ عمارت کی بالائی منزل پر لگی جس نے دیکھتے ہی دیکھتے پورے فلور کو اپنی لپیٹ میں لے لیا۔تازہ ترین اطلاعات کے مطابق فیکٹری میں لگی آگ پر قابو پانے کی ہر ممکن کوششیں جاری ہیں، اسنارکل کی مدد سے آپریشن میں شریک فائر فائٹر کی طبیعت خراب ہوگئی، جسے فوری طور پر وہاں موجود ایمبولینس میں منتقل کردیا گیا، آگ کی شدت کے باعث فائر فائٹر متاثر ہوا، فائر فائٹر کو ایمبولینس میں طبی امداد دی جارہی ہے۔آگ بجھانےکےلئے2اسنارکل ہی کارآمد ثابت ہورہی ہیں، فائربریگیڈ کی دیگرگاڑیوں کو بالائی فلور تک رسائی حاصل نہیں، ابھی تک واقعے میں کسی جانی نقصان کی اطلاع نہیں ملی۔علاوہ ازیں کراچی سائٹ ایریا میں فیکٹری میں لگنے والی تیسرے درجے کی آگ پر قابو پانے کیلئے پاک بحریہ کے اہلکار بھی امدادی کارروائیاں جاری رکھے ہوئے ہیں۔اس حوالے سے ترجمان پاک بحریہ کا کہنا ہے کہ فیکٹری میں لگی آگ بجھانے میں معاونت کی جارہی ہے، سول انتظامیہ کی درخواست پر پاک بحریہ کی ٹیم اور فائرٹینڈرز آگ بجھانے میں مصروف ہیں۔دوسری جانب ترجمان واٹر بورڈ کا کہنا ہے کہ آتشزدگی کے باعث سخی حسن ہائیڈرینٹس پر ایمرجنسی نافذ کردی گئی ہے اور پانی سے بھرے متعدد ٹینکرز روانہ کیے جارہے ہیں۔ترجمان نے کہا کہ فائربریگیڈ کو آتشزدگی کے مقام پر پانی فراہم کیا جائے گا اور آگ پر مکمل قابو پانے تک پانی کی فراہمی جاری رہے گی۔

 امریکا کوشدید مالی مشکلات کا سامنا،بائیڈن نے شٹ ڈاؤن کا خدشہ ظاہرکردیا