دریائے چناب میں اونچے درجے کے سیلاب کا خدشہ ،ہائی الرٹ جاری

دریائے چناب میں اونچے درجے کے سیلاب کا خدشہ ظاہر کیا گیا ہے، جس کے پیش نظرپنجاب ڈیزاسٹر مینجمنٹ اتھارٹی( پی ڈی ایم اے) نے ہائی الرٹ جاری کردیا ۔محکمہ آبپاشی کے مطابق متعلقہ اضلاع کوفوری اقدامات کرنے کی ہدایت کی گئی ہے، ہیڈ مرالہ، قادرآباد اور تریموں بیراج پرپانی کی سطح میں تیزی سے اضافہ ہونے لگا ، نشیبی علاقوں میں سیلاب کے خطرات بڑھ گئے ۔ ضلعی انتظامیہ نے فوری طورپرایمرجنسی اقدامات شروع کرتے ہوئے ریسکیو ٹیموں کوحساس علاقوں میں تعینات کردیا ، مقامی آبادی کومحتاط رہنے اورضرورت پڑنے پرمحفوظ مقامات پرمنتقل ہونے کی ہدایت دی گئی ۔انتظامیہ نے متعلقہ اداروں کو الرٹ رہنے اورممکنہ انخلا کی تیاری رکھنے کا حکم بھی دیا ہے، نشیبی بستیوں میں اعلانات کے ذریعے شہریوں کو باخبر رکھا جا رہا ہے۔