صدرِ مملکت آصف علی زرداری سے ایوانِ صدر میں آذربائیجان کے سفیر خازر فرہادوف کی ملاقات

صدرِ مملکت آصف علی زرداری سے ایوانِ صدر میں آذربائیجان کے سفیر خازر فرہادوف نے ملاقات کی۔ اس موقع پر صدر مملکت نے پاکستان اور آذربائیجان کے برادرانہ تعلقات کو دونوں ممالک کے مفاد میں مزید مستحکم کرنے پر زور دیا۔ صدرِ مملکت نے کہا کہ دونوں ممالک کے درمیان تجارت، معیشت اور علاقائی رابطہ کاری کو فروغ دینا ناگزیر ہے۔ انہوں نے کہا کہ براہِ راست فضائی رابطوں سے تجارتی اور عوامی تعلقات کے نئے مواقع کھلیں گے۔ آصف علی زرداری نے آذربائیجان اور آرمینیا کے تاریخی امن معاہدے پر سفیر کو مبارکباد دیتے ہوئےکہا کہ یہ امن معاہدہ خطے میں دیرپا استحکام اور خوشحالی کی ضمانت ہے۔ صدرِ مملکت نے کہا کہ پاکستان تنازعات کے حل کے لیے بات چیت اور پرامن ذرائع پر یقین رکھتا ہے ۔