پاکستان اورسعودی عرب کے درمیان تاریخی تعلقات ہیں:فوادچوہدری
اطلاعات ونشریات کے وزیرچوہدری فوادحسین نے کہاہے کہ سعودی عرب کے ولی عہدشہزادہ محمدبن سلمان کاپاکستان کادورہ دونوں ملکوں کے تعلقات کونئی بلندیوں تک لے جائے گا۔اسلام آباد میں سعودی عرب کے ذرائع ابلاغ کے وفد سے گفتگو کرتے ہوئے انہوں نے کہاکہ سعودی عرب کے ولی عہد کے دورے کے موقع پر توقع ہے کہ پاکستان میں سعودی عرب کی سرمایہ کاری کے حوالے سے مفاہمت کی مزیدیادداشتوں پردستخط کئے جائیں گے۔وزیراطلاعات نے کہاکہ سعودی عرب نے ہمیشہ پاکستان کی معیشت کومستحکم بنانے کے لئے اہم کرداراداکیاہے۔انہوں نے کہاکہ پاکستان گوادر میں سعودی عرب کی حکومت کے تیل صاف کرنے کارخانہ لگانے کے پروگرام کاخیرمقدم کرتاہے۔انہوں نے کہاکہ تیل صاف کرنے کا یہ کارخانہ ایشیا میں تیل صاف کرنے کے کارخانوں میں سے سب سے بڑا ہوگا اوراس سے روزگار کے مواقع پیدا ہوں گے۔فوادچوہدری نے کہاکہ پاکستان اورسعودی عرب کے درمیان تاریخی تعلقات ہیں اور یہ تعلقات سفارتی سطح پرانتہائی مضبوط ہیں۔انہوں نے کہاکہ سعودی عرب کے لئے ویزاپالیسی کے پروگرام پربھی غورکیاجارہاہے۔