پنجاب بھر میں دھند کا راج، حدنگاہ انتہائی کم، موٹروے کے مختلف سیکشن بند،فلائٹس شیڈول متاثر
پنجاب اور سندھ کے میدانی علاقوں میں سردی بڑھنے سے دھند میں اضافہ ہوگیا۔ موٹروے کئی مقامات سے ٹریفک کیلئے بند کر دی گئی، فلائٹس کا شیڈول بھی متاثر ہوا۔ محکمہ موسمیات نے ملک کے بیشتر علاقوں میں موسم سرد رہنے کی پیشگوئی کر دی۔پنجاب کے مختلف علاقوں میں دھند کے بادل چھا گئے، ہر منظر دھندلا گیا۔ ملتان، خانیوال، ساہیوال، سانگلہ ہل میں حد نگاہ انتہائی کم رہنے سے شہریوں کو پریشانی کا سامنا کرنا پڑا، اوکاڑہ، چیچہ وطنی اور دیگر کئی علاقوں میں شدید دھند سے معمولات زندگی متاثر ہوئے۔ موٹر وے پولیس نے دھند میں شہریوں کو بغیر ضرورت سفر سے گریز کی ہدایت کی ہے۔دھند کے باعث فلائٹس کا شیڈول بھی متاثر ہوا، لاہور ایئرپورٹ پر فلائٹ آپریشن معطل کر دیا گیا ۔
