امریکا میں ری پبلک ایئرویز کے ایک طیارے میں سوار لڑکی نے ہوائی اڈے پر لینڈنگ سے قبل جہاز کا دروازہ کھول کر خودکشی کی کوشش کی تاہم لڑکی کو بچالیا گیا۔ امریکی ٹی وی کے مطابق یہ واقعہ نیویارک کے لاگوار ڈیا ہوائی اڈے پر پیش آیا جب ڈلٹا سے آنے والی پرواز میں سوار ایک لڑکی نے جہاز کا گیٹ کھول کر خودکشی کی کوشش کی جسے ناکام بناتے ہوئے متذکرہ خاتون کو بچالیا گیا۔ طیارے میں سوار ایک مسافر خاتون اسٹابیسی ھربٹ نے بتایا کہ ایک لڑکی جس کی عمر 20 سال کے قریب تھی جہاز کی لینڈنگ کے دوران دروازہ کھول کر کودنے کی کوشش کررہی تھی جبکہ اس کے والد اسے دروازے سے دور ہٹا رہے تھے۔

خاتون مسافر کا کہنا تھا کہ لڑکی شور مچا رہی تھی اور کہہ رہی تھی وہ زندہ نہیں رہنا چاہتی بعدازاں لڑکی کو طیارے سے اترنے کے بعد باہر کھڑے روتے دیکھا گیا۔

خاتون مسافر نے بتایا کہ طیارے کی لینڈنگ کے بعد پولیس نے تمام مسافروں کو ہوائی اڈے سے باہر نکلنے سے روک دیا اور وقوعہ کے بارے میں ان کے بیانات قلمبند کیے۔

ایک دوسرے مسافر کا کہنا تھا کہ خودکشی کی کوشش کرنے والی لڑکی ڈپریشن کا شکار لگ رہی تھی۔