سپیکر قومی اسمبلی اسد قیصر نے کہا ہے کہ ایوان کے ماحول کو پر امن اور خوش گوار رکھنا حکومت اور اپوزیشن کی مشترکہ ذمہ داری ہے،ملکی مسائل کے حل کے لیے ایوان میں نمائندگی رکھنے والی جماعتوں میں اتفاقِ رائے ضروری ہے،ایوان کے ماحول کو خوشگوار رکھنے کے لیے ہمیں ایک دوسرے کی رائے کا احترام کرنا ہو گا۔ پیر کو سپیکر قومی اسمبلی اسد قیصر کی زیر ِصدارت حکومتی ا ور اپوزیشن رہنماوں کا پارلیمنٹ ہاوس میں اجلاس ہوا جس میں ایوان کے ماحول کو سازگار رکھنے سمیت ایوان میں قانون سازی کے لیے پیش کیے جانے والے اہم بِلوں پر تبادلہ خیال کیا گیا ۔جلاس میں قومی اسمبلی کے موجودہ اجلاس کو 24مئی تک جاری رکھنے کا فیصلہ کیا گیا ۔ اس موقع پر سپیکر قومی اسمبلی اسد قیصر نے کہا ایوان کے ماحول کو پر امن اور خوش گوار رکھنا حکومت اور اپوزیشن کی مشترکہ ذمہ داری ہے،موثرقانون سازی کے ذریعے عوامی مسائل کو حل اور ایوان کے وقار کو بلند کیا جا سکتا ہے، اسپیکرقومی اسمبلی نے کہا ملکی مسائل کے حل کے لیے ایوان میں نمائندگی رکھنے والی جماعتوں میں اتفاقِ رائے ضروری ہے، اس وقت ملک کو جن مسائل کا سامنا ہے ان پر قابو پانے کے لیے تمام سیاسی قوتوں کو کردار ادا کرنا ہو گا، پارلیمنٹ کی مضبوطی جمہوریت کی مضبوطی و استحکام کے لیے ناگزیر ہے،ایوان کے ماحول کو خوشگوار رکھنے کے لیے ہمیں ایک دوسرے کی رائے کا احترام کرنا ہو گا۔اجلاس کے شرکا کی قانون سازی کے عمل اور ایوان کی کاروائی کو سازگار رکھنے میں ہر ممکن تعاون کی یقین دہانی کروائی ۔جلاس میں وزیرِ دفاع پرویز خٹک، وزیر برائے خارجہ امور شاہ محمود قریشی، وزیرِ مذہبی امور نور الحق قادری، ڈپٹی سپیکر قومی اسمبلی قاسم خان سوری، اراکینِ قومی اسمبلی سید خورشید شاہ، راجہ پرویز اشرف، سید نوید قمر، خواجہ محمد آصف، رانا تنویر حسین، احسن اقبال اور محسن داوڑ سمیت دیگر اراکین نے شرکت کی۔

سعودی ولی عہد کے خلاف جرمنی میں خاشقجی قتل کی شکایت درج