پاکستان کے آئی ایم ایف کیساتھ معاملات چند روز میں طے ہوجائیں گے، امریکی سفیر
امریکی سفیر ڈونلڈ بلوم نے کہا ہے کہ آئی ایم ایف کے ساتھ پاکستان کے معاملات چند روز میں طے ہوجائیں گے، آئی ایم ایف کے معاملے پر پاکستان کے ساتھ تعاون کو تیار ہیں۔ اسلام آباد نیشنل ایگریکلچر ریسرچ سینٹر میں منعقدہ تقریب سے خطاب کرتے ہوئے امریکی سفیر ڈونلڈ بلوم نے کہا ہم چاہتے ہیں پاکستان اور آئی ایم ایف کے درمیان معاہدہ ہوجائے، آئی ایم ایف معاہدے کے حوالے سے پاکستان کی مکمل حمایت کرتے ہیں۔ ڈونلڈ بلوم نے کہا کہ پاکستان کو دہشت گردی کے خطرات کا سامنا ہے، اس سلسلے میں بھی امریکا پاکستان کی مدد کیلئے مکمل تیار ہے، پاکستان اور امریکا کے درمیان سفارتی تعلقات میں بہت پیشرفت ہوئی ہے۔ امریکی سفیر کا مزید کہنا تھا کہ رواں ہفتہ انتہائی اہم ہے، کل پاکستان کے ساتھ انرجی ڈائیلاگ ہوگا جبکہ جمعرات کو دونوں ممالک کے درمیان موسمیات پر مذاکرات ہوں گے۔
