وزیراعظم عمران خان نے سول سرونٹس سے خطاب کرتے ہوئے کہا کہ دنیا میں کوئی چیز ناممکن نہیں، کوئی بھی کام کرنے کے لیے انسان کو خود کو بدلنا پڑتا ہے۔ ہماری ایلیٹ کی سوچ وہی ہے جو انگریز چھوڑ کر گئے، جب قوم اور حکومت ایک ہو تو فوج 6 لاکھ کے بجائے 20 کروڑ بن جاتی ہے۔ وزیراعظم کا کہنا تھا کہ ہم آتے جاتے رہتے ہیں مگر سول سرونٹس مستقل حکومت ہیں، 10سال میں قرض 6 ہزار سے بڑھ کر 30 ہزار ارب پر پہنچ گیا، قرضوں پر روزانہ 6 ارب روپے سود دے رہے ہیں۔ موجودہ حالات کیلئے پوری قوم کو خود کو بدلنا ہو گا، حکمران، بیورو کریٹس اپنے آپ کو بدلیں، ہمارے پاس ملک چلانے کیلئے پیسہ ہی نہیں ہے، بیورو کریسی آزادی سے کام کرے، اس کے ساتھ کھڑے ہوں گے۔ عمران خان نے کہا ڈھائی کروڑ بچے سکول نہیں جاتے، تبدیلی لائے بغیر معاشی ابتری سے نکلنا مشکل ہے، ہمیں انگریز کے دور کی سوچ کو تبدیل کرنا ہے۔ وزیراعظم ہاؤس کے 540 ملازم ہیں، ہمیں تو انجوائے کرنا چاہیے لیکن ہم ایسا نہیں کریں گے، گاڑیاں اور بھینسیں نیلام کر رہے ہیں، انہوں نے کہا اورنج ٹرین جیسے منصوبے قرض لیکر بنائے گئے جو خسارے میں ہیں، پاکستان میں آلودہ پانی سے بچوں کی ہلاکت کی شرح دنیا میں سب سے زیادہ ہے، ملک میں 40 فیصد بچے پوری نشوونما نہیں کر پاتے، ملک میں تعلیم کا سسٹم بگڑا ہوا ہے، اس وقت ڈھائی کروڑ بچے سکولوں میں نہیں ہیں۔ انہوں نے کہا ہمیں انگریز کے دور کی سوچ کو تبدیل کرنا ہے، ایک ایک پیسہ عوام کی فلاح و بہبود پر خرچ ہونا چاہئے۔ احتساب کے بغیر ملک نہیں چل سکتا، کرپشن کرنے والے لوگ پہلے اداروں کو تباہ کرتے ہیں، چیئرمین نیب سے کہا ہے کہ اگر کسی بیوروکریٹ سے تفتیش کرنی ہے تو اس کی تذلیل نہ کی جائے، بیوروکرٹ اگر کام نہیں کرے گا تو ہم جتنی مرضی پالیسی بنائیں کامیاب نہیں ہوں گے، ہم بڑا رسک لے رہے ہیں۔ غلطیاں ہوتی ہیں،لیکن ان کا دفاع کرنا غلط ہے۔ انہوں نے کہا سول سرونٹس کی جو بھی سیاسی وابستگی ہو آپ ملک کیلئے پرفارم کریں۔ دنیا میں کوئی بھی قوم سیدھی اوپر نہیں جاتی، قوموں کی زندگی میں اونچ نیچ آتی ہے، اس وقت ہمارے حالات برے ہیں لیکن ایک طاقت ہے، اگر طرز حکمرانی ٹھیک کرلیں تو یہ قوم تیزی سے اوپر جائے گی۔