وزیراعظم عمران خان نیک نیتی سے کام کر رہے ہیں: چوہدری شجاعت حسین
لندن: مسلم لیگ ق کے صدر چوہدری شجاعت حسین کا کہنا ہے کہ وزیراعظم عمران خان نیک نیتی سے کام کر رہے ہیں، ان کے ساتھ تعاون جاری رکھیں گے۔ تفصیلات کے مطابق مسلم لیگ ق کا صدر چوہدری شجاعت حسین کا لندن میں میڈیا سے گفتگو کرتے ہوئے کہنا تھا کہ ملک کی خاطر عمران خان کے ساتھ ہر ممکن تعاون جاری رکھیں گے۔ انہوں نے کہا کہ ملک میں پچھلی حکومتوں کی ناکامیوں کی وجہ سے ایسی صورت حال ہے، وزیراعظم سچی نیت کے ساتھ ملک کی خدمت کررہے ہیں۔ پوچھے گئے سوال پر ان کا کہنا تھا کہ میرا اور شہبازشریف دونوں کا ایک دوسرے سے ملاقات کا دل نہیں، میں اور شہبازشریف چاہتے ہی نہیں کہ ملاقات ہو۔ خیال رہے کہ گذشتہ دنوں ق لیگ کے صدر چوہدری شجاعت حسین نے وزیرِ اعظم ہاؤس میں عمران خان سے اہم ملاقات کی تھی، جس میں ملک کی مجموعی اور سیاسی صورتِ حال پر تبادلہ خیال کیا گیا تھا۔