بھارتی ریاست اتر پردیش کی حکومت میں وزیر اوم پرکاش راج بھر نے نفرت انگیز مذہبی بیانات دینے والے رہنماوں کو نذرِ آتش کرنے کی بات کہہ دی۔ 13 جنوری کو علی گڑھ میں ایک ریلی سے خطاب کرتے ہوئے راج بھر نے یہ بھی کہا کہ ان سیاسی رہنماوں کو نذر آتش کردیا جائے جو مذہب کی بنیاد پر لڑانے کی کوشش کرتے ہیں۔ تب ہی انہیں دوسروں کے دکھ درد کا احساس ہوگا۔راج بھر نے ہندو، مسلم فسادات میں بے قصور لوگوں کی موت پر افسوس ظاہر کرتے ہوئے کہا کہ نفرت انگیزی کرنے والے رہنما آگ کا شکار کیوں نہیں ہوتے۔ ایسے رہنما ہندووں اور مسلمانوں کے درمیان خلیج پیدا کرنے کا کام کرتے ہیں۔ بھارتی آئین میں ہر بھارتی کو ووٹ دینے کا حق حاصل ہے مگر بعض سیاسی رہنما فرقہ پرستی کی آگ بھڑکانے میں مصروف رہتے ہیں۔