پنجاب حکومت کا لاہور کو خوبصورت اور صاف ستھرا بنانے کا فیصلہ
تفصیلات کے مطابق وزیر اعلیٰ پنجاب عثمان بزدار کی ہدایت پر صوبائی وزیر صنعت و تجارت میاں اسلم اقبال کی زیر صدارت اہم اجلاس ہوا۔ پنجاب سرمایہ کاری بورڈ کے کمیٹی روم میں ہونے والے اجلاس میں ترقیاتی اداروں کے سربراہان نے شرکت کی ۔ اجلاس میں شہر کی خوبصورتی بڑھانے، پارکنگ اور ٹریفک کے مسائل کے حل کیلئے اہم فیصلے کئے گئے۔ صوبائی وزیر صنعت و تجارت میاں اسلم اقبال نے کہا کہ شہروں کو خوبصورت اور صاف ستھرا بنانے کیلئے حکومت وسائل فراہم کرے گی،شہری سہولتوں کو بہتر بنانے کے لئے تیزی سے اقدامات کئے جائیں گے،ترقیاتی اداروں کو ٹائم لائن کے اندر ترقیاتی منصوبوں کو مکمل کرنا ہوگا۔ انہوں نے کہا کہ لاہور پاکستان کا دل ہے، اسے خوبصورت اور صاف ستھرا شہر بنائیں گے ۔ شہر کی سڑکوں بالخصوص داخلی راستوں کوبہتر بنایا جائے گا۔ صوبائی وزیر صنعت و تجارت نے شہر کی اہم چوراہوں پرٹریفک کے دباؤ کو کم کرنے کے لئے ان کی ری ماڈلنگ کی ہدایت کرتے ہوئے کہا کہ اہم شاہراہوں کو اعلیٰ معیار کی لائٹس، پھولوں اور پودوں سے خوبصورت بنایا جائے ۔ شہر کی سڑکوں کو بہتراور خوبصورت بنانے کا پروگرام مرحلہ وار شروع کیا جائے گا،پہلے مرحلے میں مال روڈ کوپائلٹ پراجیکٹ کے طور پر بہتر بنایا جائے گا، غیر ضروری پارکنگ کے اڈوں اور اشتہارات کی بھرمار نے شہر کی خوبصورتی کو متاثر کیا ہے ۔ ساتھ ہی انہوں نے غیر ضروری پارکنگ اڈوں اور غیر ضروری اشتہارات کے سدباب کے لئے اقدامات کی ہدایت کی
