وزیراعظم عمران خان آج قبائلی علاقے باجوڑکا دورہ کریں گے
اسلام آباد: وزیراعظم عمران خان آج خیبرپختونخواہ کے اضلاع باجوڑ اور مہمند کا دورہ کریں گے۔ تفصیلات کے مطابق وزیراعظم عمران خان آج قبائلی علاقے باجوڑ اور مہمند کا دورہ کریں گے، فاٹا کے انضمام کے بعد یہ وزیراعظم کا پہلا دورہ ہوگا۔ گورنرخیبرپختونخواہ شاہ فرمان، وزیراعلیٰ محمود خان، افتخار درانی، وفاقی اور صوبائی وزرا بھی وزیراعظم کے ہمراہ ہوں گے۔ وزیراعظم عمران خان ضلع باجوڑ کے علاقے خار میں قبائلی عمائدین سے خطاب کریں گے اور ضلع مہمند کے علاقے غلنئی میں نئے تعمیر شدہ کیڈٹ کالج کا افتتاح کریں گے۔ وزیراعظم پاکستان ضلع مہمند میں بھی قبائلی عمائدین سے خطاب کریں گے، توقع ہے کہ وزیراعظم اس موقع پردونوں اضلاع کے لیے متعدد ترقیاتی منصوبوں کا بھی اعلان کریں گے۔ یاد رہے کہ رواں سال جنوری میں وزیراعلیٰ خیبرپختونخواہ محمود خان نے شاکس لیویز سینٹر میں منعقد تقریب سے خطاب کرتے ہوئے کہا تھا کہ فاٹا میں پانچ سال تک کوئی ٹیکس لاگو نہیں کیا جائے گا، قبائلی اضلاع میں نئے اسکول اور صحت کے مراکز کو آباد کریں گے۔
